राष्ट्रपति विद्या भण्डारीको आगामी २७ गते देखि हुने भनिएको एक साता लामो औपचारिक भारत भ्रमण अन्तिम समयमा आएर रद्ध भएको छ।
अन्तिम समयमा भारत भ्रमण रद्ध हुनुले ओली सरकार र भारतबीच सम्बन्ध अझै चिसिएको संकेत गर्छ।
कुम्भ मेलाको अवसर पारेर राष्ट्रपति भण्डारीको एक साता लामो भारत भ्रमण हुने लगभग तय भएको थियो।
मन्त्रिपरिषदले निर्णय नगरेका कारण भ्रमण अहिलेका लागि स्थगित हुनुपरेको राष्ट्रपति कार्यालयले जानकारी गराएको छ।
‘भ्रमण अनौपचारिक हुने कुरा थियो, ठीकै थियो। तर जब औपचारिक हुने सुनियो, त्यस्तो भ्रमणका निम्ति पर्याप्त समय पुगेन। त्यसैकारण अहिलेका लागि भ्रमण स्थगित गर्नुपर्यो,’ प्रधानमन्त्री केपी ओलीका सहयोगी प्रमोद दाहालले सेतोपाटीसँग भने।
तर सरकारका अन्य अधिकारीहरू भने ‘समय नपुगेको कारणले’ भ्रमण स्थगित गरिएको बाहिर भनिएपनि ओली सरकार र भारतबीच पछिल्लो तनावका कारण भ्रमण रद्ध भएको स्वीकार्छन्।
‘पछिल्लो समयमा सरकार परिवर्तनको षड्यन्त्रमुलक खेलमा भारत संग्लग्न भयो। यस्तो अवस्थामा भ्रमणको अर्थ रहेन,’ प्रधानमन्त्री निकट एक अधिकारीले भने, ‘राष्ट्रपतिको गर्ने भ्रमणले दुई देशबीच सम्वन्ध सुमधुर भएको वा सुमधुर हुने दिशा तर्फ गएको सन्देश दिन्छ। तर पछिल्लो भारतीय खेलले त्यस्तो सन्देश दिएन।’
कांग्रेसको समर्थनमा एमाओवादी नेतृत्वको सरकार निर्माण गर्ने तयारी भारतीय ‘षडयन्त्र’ अन्तर्गत भएको एमालेको बुझाइ रहेको छ।
परराष्ट्र मन्त्रालयले नयाँ दिल्लीस्थित नेपाली राजदूतावासलाई राष्ट्रपतिको भ्रमण रद्ध भएको जानकारी गराइसकेको छ।
आफू भारत भ्रमणमा जाना लागेको कुरा राष्ट्रपति भण्डारी आफैले संचार माध्यमलाई बताएकी थिइन्। तर, भ्रमणबारे मन्त्रिपरिषदले निर्णय गरिसकेको थिएन।
