प्रधानमन्त्री केपी शर्मा ओलीले संसद विघटन नहुने बताएका छन्।
संसदलाई बिहीबार सम्बोधन गर्दै ओलीले संसदबाट चुनिएको प्रधानमन्त्रीले लोकतान्त्रिक अभ्यासविरुद्ध नउभिने भन्दै संसद विघटन नहुने बताएका हुन्।
‘थुप्रै हल्ला र चर्चा चलेका मैले देखेँ। हल्लाका कुरा पनि आधार बनाए। संसद विघटन गर्दैछन् भन्ने पनि हल्ला चल्यो,’ ओलीले भने,‘ संसद भंग हुँदैन, संसदीय अभ्यासबाटै अघि बढ्छौ। तर्किने, उम्कने जस्केलाबाट हिड्ने तरिका म गर्दिनँ। संसदले मलाइ छानेको हो।’
प्रधानमन्त्री ओलीले षयडन्त्र र धोकामा राष्ट्रिय सहमति नहुने पनि बताए। अहिलेको आवश्यकता राष्ट्रिय आवश्यकता हो कि लोकतान्त्रिक संसदीय अभ्यास हो? भनी प्रश्न गरेका छन्। उनले अहिले संविधान कार्यान्वयन, पुनर्निर्माण, जनताको समस्याको समाधान रहेको बताए।
उनले मनगढन्ते असन्तुष्टि र बिरोधहरू रहेको भन्दै उनले तिनीहरूलाई अन्त्य गर्ने संवाद र सहमतिबाट भएको बताए। संवाद गरेन, सहमति गरेन भन्ने आरोप लाग्ने गरेको भन्दै उनले असन्तुष्टि छन् भने बसेर छलफल गर्न आग्रह गरेका छन्।
अस्थिरता ल्याउन खोज्ने खालका सधैं दौडबाजी हुने गरेको आरोप प्रधानमन्त्रीले लगाए। त्यस्ता प्रयास र गतिविधि हुने गरेको भन्दै त्यसबाट समस्या समाधान नहुने ओलीले बताए।
जिम्मेवार राजनीतिक दलहरू बसेर छलफल गर्नुपर्ने बताए। देश कसरी अगाडि बढाउने खुलस्तसँग बसेर छलफल गर्न सकिने उनले बताए।
