आफ्नो नेतृत्वको सरकारलाई सहयोग गर्न अन्तिम आग्रहसहित एकीकृत नेकपा माओवादी अध्यक्ष पुष्पकमल दाहाल बालुवाटार पुगेका छन्। लाजिम्पाटस्थित दाहाल निवासमा बसेको स्थायी समिति बैठकले आफ्नै नेतृत्वमा सरकार गठनका लागि एमालेलाई आग्रह गर्ने भनी गरेको निर्णय लिएर दाहाल ओलीकहाँ पुगेका हुन्।
एमाओवादी नेता दीनानाथ शर्माका अनुसार दाहालले प्रधानमन्त्रीलाई एमाओवादी नेतृत्वमा अब गठन हुने नयाँ सरकारलाई सहयोग गर्न आग्रह गर्नेछन्। ‘सम्भवतः प्रधानमन्त्रीसँग यो अन्तिम वार्ता हुनेछ,’ शर्माले सेतोपाटीसँग भने।
सरकारलाई दिएको समर्थन फिर्ता लिने विषयमा प्रधानमन्त्रीसँग भएको वार्तापछि पुनः एमाओवादी स्थायी कमिटी बैठक बिहीबार बस्ने शर्माले बताए। ‘सरकारलाई दिएको समर्थन फिर्ता लिने विषयमा पुनः हाम्रो बैठक बस्नेछ,’ उनले भने।
नेपाली कांग्रेसले सरकारको नेतृत्व लिन दाहाललाई प्रस्ताव गरेपछि एमाओवादी आफ्नै नेतृत्वमा सरकार गठन गर्ने कसरतमा लागेको छ। ‘एमाओवादी नेतृत्वमा राष्ट्रिय सहमतिको सरकार गठन हुन्छ भने हाम्रो समर्थन हुन्छ भन्ने प्रस्ताव कांग्रेसले ल्याएको हुनाले एमालेलाई पनि सँगै लिएर जान सकिन्छ कि भन्ने प्रयास हो,’ शर्माले भने।
बैठकमा सहभागी नेताहरूले सरकारमा सामेल भए पनि पार्टी सरकारमा भएजस्तो अनुभूति नभएको, मन्त्रीलाई अप्ठेरो पार्ने, सरकारले जनताको पक्षमा काम गर्न नसकेको र जनताको कामभन्दा पनि एमाले कार्यकर्ता भर्ती गर्न थालेको, सुविधा खाइराख्ने पनि काम भएको बताएका थिए। ‘एमालेले गरेका गलत कदमको जवाफदेही हामी पनि हुनुपर्दा अप्ठेरो भएको नेताहरूले गुनासो गर्नुभएको छ,’ शर्माले भने।