नयाँ सरकार बनाउने विषयमा संसद भवन नयाँ बानेश्वरमा बसेको नेपाली कांग्रेस र संयुक्त मधेसी मोर्चाबीच बैठक सकिएको छ।
बैठकमा कांग्रेसले नयाँ सरकार गठनमा सघाउन मोर्चालाई आग्रह गरेको छ। एमाओवादी अध्यक्ष पुष्पकमल दाहालको नेतृत्वमा नयाँ सरकार बनाउने एमाओवादी पदाधिकारी बैठकले निर्णय गरेपछि नयाँ राजनीतिक सरगर्मी सुरु भएको हो। सोही अनुसार मोर्चासँग कांग्रेसले छलफल गरेको हो।
कांग्रेसले राखेको प्रस्तावबारे मोर्चाले आफूहरूको माग सम्बोधन भए विचार गर्न सकिने धारणा राखेको बैठकमा सहभागी एक नेताले बताए।
बैठकमा नेपाली कांग्रेसका सभापति शेरबहादुर देउवा, कोषाध्यक्ष सितादेवि यादव तथा नेताहरु गोपालमान सिंह, महेश आचार्य, विमलेन्द्र निधी, चिनकाजी श्रेष्ठलगायत सहभागी थिए।
यस्तै मोर्चाका तर्फबाट तमलोपा अध्यक्ष महन्थ ठाकुर, संघीय फोरम अध्यक्ष उपेन्द्र यादव, सद्भावना अध्यक्ष राजेन्द्र महतो तथा नेताहरु लक्ष्मणलाल कर्ण, राजकिशोर यादवलगायत सहभागी थिए।
