पूर्वप्रधानमन्त्री एवम् नयाँ शक्ति नेपालका संयोजक डा. बाबुराम भट्टराईले सरकार बनाउने र गिराउने खेल पुरानै भएको बताएका छन्। भट्टराईले यसमा आश्चर्य मानिरहनु नपर्ने बताए।
पछिल्लो विकसित राजनीतिक घटनाक्रममाथि टिप्पणी गर्दै भट्टराईले भनेका छन्, ‘सरकार बनाउने र गिराउने खेल केटाकेटीको भाँडाकुटी खेलझैं नेपालका पुराना राजनीतिक शक्तिहरूको पुरानै जानेमानेको खेल हो, यसमा आश्चर्य मान्नुपर्ने केही छैन।’
भट्टराईले पात्रमात्र फेरिएको र थपिएको तर प्रवृत्ति उही भएको जनाएका छन्।
भट्टराईले राष्ट्रियताजस्तो पवित्र कुरालाई यो फोहोरी खेलमा सधैं बलि दिइने गरेको आरोप लगाएका छन््। ‘पहिले ओली सरकार बनाउँदा पनि राष्ट्रिय स्वाधीनता एवम् स्वाभिमानको रक्षा निम्ति रे,’ उनले ट्वीटरमा लेखेका छन्, ‘अहिले ओली सरकार गिराउँदा नि उही राष्ट्रिय स्वाधीनता एवम् स्वाभिमानको रक्षा निम्ति नै।’