नेपाली कांग्रेसका केन्द्रीय सदस्य तथा सांसद डा. शेखर कोइरालाले एमाले नेतृत्वको वर्तमान सरकारले राजीनामा दिए उपयुक्त हुने बताएका छन्। उनले सरकार सबै दृष्टिले काम गर्न नसक्ने भइसकेकाले यसको विकल्प खोजिनु नै उपयुक्त हुने बताए।
एमाओवादी अध्यक्ष पुष्पकमल दाहाललाई प्रधानमन्त्री बन्न प्रस्ताव गरेपछि कोइरालाको यस्तो धारणा आएको हो। ‘सरकार सबै दृष्टिकोणले असफल भइसकेकाले यसको विकल्प खोज्नुपर्छ भन्ने सबै राजनीतिक पार्टीबाट धारणा आएको मैले बुझेको छु,’ सेतोपाटीसँग कुरा गर्दै कोइरालाले भने, ‘कांग्रेस संसदीय दलको बैठकले सरकारको विकल्प खोज्नुपर्ने निष्कर्ष निकालेको छ, पहिलो पार्टी भएको नाताले हामीले नयाँ सरकार निर्माणमा चासो राख्नु स्वभाविक हो।’
कोइरालाले सके कांग्रेसकै नेतृत्वमा र नभए अन्य राजनीतिक पार्टीको नेतृत्वमा सरकार निर्माण गर्नका लागि कांग्रेसले पहल गर्ने बताए। ‘शेरबहादुरजीले सबै पार्टीहरूसँग छलफल गरिरहनुभएको होला,’ कोइरालाले भने, ‘अब उखान टुक्काले देश चल्दैन।’
संविधान कार्यान्वयनमा उदासिनता, मधेसको सवालमा विपरीत दिशामा हिँडिरहेको, अन्तर्राष्ट्रिय सम्बन्ध बिग्रेको, पुनर्निर्माणमा असफल भएको, अभाव र कालोबजारीलाई प्रश्रय दिएकोलगायत सबै क्षेत्रबाट सरकारले काम गर्न नसकेको कोइरालाले बताए।
‘पुनर्निर्माणको काम गर्न नसकेर अहिले भूकम्पको खर्च एमालेले एनजिओकरण गर्न खोजिरहेको छ, न्यायपालिकालाई एमालेकरण गर्न खोजेको छ,’ कोइरालाले भने, ‘एमाओवादी पनि सन्तुष्ट छैन, राप्रपा नेपाल पनि छैन, सबै दल सन्तुष्ट छैनन्, अब एमालेले के निर्णय गर्छ त्यहीअनुसार हामी अगाडि बढ्छौं।’
प्रमुख प्रतिपक्ष तथा सरकार पक्षबाटै विकल्प खोजी भइरहेका बेला अहिले एमाले स्थायी समिति बैठक बालुवाटारमा बसिरहेको छ।
संसदीय सुनुवाई समिति भंग गरेर एमालेले नियुक्तिहरूमा व्यवधान सिर्जना गरेको कोइरालाले आरोप लगाए। ‘राजदुत नियुक्ति गर्ने कुरामा हाम्रो सरोकार हैन, तर संसदीय सुनुवाई समितिलाई एमालेले जसरी रोकिरहेको छ, त्यो असंवैधानिक बाटो हो,’ कोइरालाले भने, ‘ संविधानलाई कागजको खोस्टा बनाएर एमाले हिँडिरहेको छ।’