उपप्रधानमन्त्री तथा परराष्ट्रमन्त्री कमल थापाले छिमेकी मुलुक भारतले नेपालको संविधानका बारेमा विश्व समुदायमा योजनावद्ध र संगठित रुपमा भ्रम फैलाएको आरोप लगाएका छन्।
दश दिन लामो अमेरिका र बेलायत भ्रमण पूरा गरी शुक्रबार अपरान्ह स्वदेश फर्किएका उपप्रधानमन्त्री तथा परराष्ट्रमन्त्री थापाले भारतले संविधान र नेपालको राजनीतिक अवस्थाका बारेमा योजनावद्ध रुपमा नै भ्रम फैलाएको आरोप लगाए।
उनले अमेरिका र बेलायतका विदेशमन्त्री र उच्च अधिकृत तथा संयुक्त राष्टसंघका प्रतिनिधिहरुले आफूसँगै एउटै भाषा र शैलीमा संविधानका बारेमा चासो राख्नुले संविधानको विरोधमा योजनावद्ध रुपमा नै भ्रम फैलाइएको पुष्टि भएको बताए।
उपप्रधानमन्त्री तथा परराष्ट्रमन्त्री थापाले अमेरिका र बेलायत भ्रमणका क्रममा आफूले संविधानका विरुद्धमा फैलाइएको भ्रम चिर्ने प्रयास गरेको बताए। उनले अमेरिकी विदेशमन्त्री जोन केरीले संविधान र पहिलो संशोधनको स्वागत गर्दै नेपालको आर्थिक र सामाजिक रुपान्तरणमा सहयोग गर्ने प्रतिबद्धता जनाएको बताए।
राष्ट्रसंघीय कार्यक्रममा भाग लिन अमेरिका गएका उपप्रधानमन्त्री तथा परराष्ट्रमन्त्री थापा बेलायत हुँदै स्वदेश फर्किएका हुन्। उनले बेलायतमा रहँदा त्यहाँका विदेशमन्त्रीसँग भेट गरी नेपाली सेनाका कर्णेल कुमार लामाको रिहाइबारे चासो राखेका थिए। उनले बेलायती विदेशमन्त्रीले कर्णेल लामाको मुद्दाको सुनुवाइ अबको दुई महिनाभित्र भइसक्ने भन्दै अदालतमा विचाराधीन मुद्दामा सरकारले हस्तक्षेप गर्न नमिल्ने बताएको जानकारी दिए।
द्वन्द्वकालमा मानव अधिकार उल्लंघनमा संलग्न भएको अभियोगमा नेपाली सेनाका कर्णेल लामा बेलायतमा पक्राउ परेको तीन वर्ष नाघिसकेको छ।
