रक्षा मन्त्रालयबाट नेपाली सेनाको जंगी अड्डामा मौखिक निर्देशन दियो - रक्षामन्त्री भीम रावलको सुदूरपश्चिम भ्रमणको लागि हेलिकप्टर व्यवस्था गर्नू। यति दिन उति दिन नखुलाइएको उक्त निर्देशनपछि जंगी अड्डाले २१ सिट क्षमताको एमआई १७ हेलिकप्टर व्यवस्था गर्यो।
रक्षामन्त्री रावल ९ गते अछामका लागि सेनाको हेलिकप्टर चढे। मन्त्री रावलले अछाम, डडेलधुरा र बाजुरा जिल्लाका विभिन्न ठाउँ चक्कर लगाए। सोमबार बिहान ८ः१५ मा अछामबाट उनी काठमाडौं उड्दा आइपुग्दासम्म पाँच दिन पुगिसकेको थियो।
यो पुरापुर चार दिन समयमा उनले मन्दिर उद्घाटन, पार्टीको नगर कमिटी अधिवेशन, विद्यालय उद्घाटन, सेनाको ब्यारेक निरीक्षणदेखि कर्मचारी संगठनका मान्छे भेट्न भ्याए। विभागीय जिम्मेवारीअनुसार रावलको क्षेत्र नेपाली सेना हो। सेनाको गतिविधिमा बढी सक्रिय हुनुपर्ने बुझाइको विपरीत मन्त्री रावल देखिए। उनले छात्राबास उद्घाटनदेखि मन्दिर शिलान्यास तथा पार्टीका अधिवेशन उद्घाटन गर्न सेनाको हेलिकप्टर प्रयोग गरे।
रावल सेनाको हेलिकप्टर लिएर चार दिन चक्कर लाउँँदा जम्मा दुई वटा ब्यारेक छिरे। समय घर्केका कारण डडेलधुराको एउटा ब्यारेकमा बास बसे। बाजुराको एउटा ब्यारेकमा थोरै समय बिताए। जंगी अड्डाका अनुसार रक्षामन्त्रीका लागि हेलिकप्टर दिइएको हो - भ्रमण छ भनिएकाले।
जंगी अड्डाका अनुसार मन्त्रीको भ्रमणमा कहिले निजी सचिवालय तथा कहिले मन्त्रालय आफैंले निर्देशन दिन्छ, त्यो कहिले लिखित कहिले मौखिक हुन्छ।
डडेलधुरा, अछाम र बाजुराका सुरक्षा अधिकारीले रक्षामन्त्री रावल चारै दिन सेनाको हेलिकप्टरमा चारैतिर घुमेको विवरण सेतोपाटीलाई उपलब्ध गराएका छन्।
९ गते मंगलसेन पुग्नेवित्तिकै रावलले विद्यालय भवन उद्घाटन गरे। स्रोतका अनुसार रावलले सोकट–दशपल्ले माविको भवन उद्घाटन गरेका थिए। त्यो विद्यालय भवन उद्घाटनपछि रावल डडेलधुरा उडे।
मन्त्री रावल डेढ बजे डडेलधुरा पुगे। दुई बजे कार्यक्रम राखिएको थियो। उग्रतारा उच्च माध्यमिक विद्यालयमा पुस्तक वितरणमा सहभागी भए रावल। त्यसपछि जिल्ला प्रशासन कार्यालय गए, सुरक्षा प्रमुखहरूसँग भेटघाट गरे। त्यही दिन उनले अमरगढीको सैनिक टुकुडीको निरीक्षण गरे। त्योबीच अमरगढी नगरपालिकामा एमाले नगर कमिटीको अधिवेशन उद्घाटन गरे।
साँझ गरुणदल गणमा बास बसे।
मन्त्री रावल १० गते फेरि अछाम गए। अछामको लुङ्ग्रास्थित सिर्जनशील विद्यालय उद्घाटन गरे। अनि एमाले तेस्रो प्रतिनिधि परिषदको उद्घाटन गरे।
११ गते बाजुरा गए। बाजुराको माइताडी ब्यारेक देवी बक्स गुल्म निरीक्षण गरे। त्यसपछि बाजुरा क्याम्पसको छात्राबास उद्घाटन गर्न पुगे। फेरि बाजुरास्थित बालमन्दिरका बालबालिकालाई पुस्तक बाँड्न पुगे।
खेलकुदको कभर्ड हल शिलान्यास गर्न पुगे। पार्टीको भारताडी नगर कमिटीको अधिवेशन उद्घाटन गर्न गए।
फर्के। १२ गते फेरि आफ्नै जिल्ला अछाम आए, पत्रकार सम्मेलन गरे। कार्यालय प्रमुखहरू भेटे।
मार्कुरेस्थित गाविस भवनको उद्घाटन गरे। लङ मातादेवीको मन्दिर उद्घाटन गर्न गए। अछामका सुरक्षा अधिकारीका अनुसार साँखेबगरमा हालसालै भएको आगलागी प्रभावित क्षेत्र रावल पुगे।
बयलपाटास्थित महेन्द्र उच्च माविमा पाठ्यपुस्तक निःशुल्क वितरण गरे। जनता क्याम्पसमा अभिभावक भेलामा गए। पेशागत संघ संगठनहरूसँग भेटघाट गरे। यति गर्दा रावलको चार दिन बितेको थियो।
सेना प्रवक्ता जर्नेल ताराबहादुर कार्कीका अनुसार माथिल्लो निकाय रक्षा मन्त्रालयले हेलिकप्टर मागेपछि जंगी अड्डाले व्यवस्था मिलाएको हो। ‘माथिल्लो निकायले मौखिक रुपमा माग गरेपछि हामीले हेलिकप्टरको व्यवस्था मिलाएका हौं,’ कार्कीले भने, ‘हामीसँगै सरोकार राख्ने माथिल्लो निकायले भनेपछि किन के का लागि भन्ने कुरा थिएन।’
दुई वटा ब्यारेक भ्रमणमा चार दिनको समयबारे उनले भने, ‘यति दिन उति दिन भन्ने थिएन, हामीले माथिको आदेशअनुरुप हेलिकप्टर व्यवस्था मिलाएका हौं, थुप्रै ब्यारेकहरू छन् ती जिल्लामा, मन्त्रीज्यू कहाँ–कहाँ जानुभयो जानकारी पुरै आइपुगेको छैन।’
रक्षामन्त्री रावलले आफ्नो जिम्मेवारीमा आएका महत्वपूर्ण सरकारी काम निम्ति भ्रमणमा गएको बताएका छन्। दुई ब्यारेक निरीक्षणमध्ये बाजुराको कोल्टीमा जग्गा अधिग्रहण गर्न विगतदेखि समस्या रहेको र त्यसबारे महत्वपूर्ण छलफल गरेको रावलले बताए। ‘सेनका कर्णेलदेखि स्थानीय मान्छे सहभागी गराएर मैले त्यहाँको समस्याबारे छलफल गरेँ,’ उनले भने, ‘त्यसको निर्णय गर्न बाँकी छ।’
शिक्षा मन्त्रालयले जिम्मेवारी दिएअनुसार आफ्नो क्षेत्रमा गएर निःशुल्क पाठ्यपुस्तक वितरण गरेको बताए। उनले त्यसबीचमा आफन्त, शुभचिन्तक र कार्यकर्तासँग भेटघाट हुनु नौलो कुरा नभएको बताए। ‘हामीकहाँ कुरा नबुझी बोल्ने संस्कार छ, म जति दिन बसेँ सबै महत्वपूर्ण काम थिए,’ उनले भने, ‘भ्रमणमा शुभचिन्तक र कार्यकर्तासँग पनि भेट भयो, यो सामान्य थियो।’