सप्तरीको ठेलिया गाविस–४ का ५८ वर्षीय सुकदेव चौधरीको हत्याको आरोपमा प्रहरीले सोही ठाउँका एकै परिवारका तीनजनाबिरुद्ध आज जिल्ला अदालतमा कर्तव्य ज्यान मुद्दा दर्ता गरेको छ।
हत्या आरोपमा प्रहरीले ठेलिया गाविस–४ की ४० वर्षीया ईश्वरवती चौधरी, निजको छोरा २२ वर्र्षीय सागर चौधरीबिरुद्ध जिल्ला अदालतमा आज मुद्दा दर्ता गरेको जिल्ला प्रहरी कार्यालयले जानकारी दिएको छ।
गत भदौ २८ गते साँझ ७ बजे आरोपितको आक्रमणको डेढ घन्टापछि पीडितको घटनास्थलमै मृत्यु भएपछि प्रहरीले घटनामा संलग्न रहेको आरोपमा सोही राति आरोपितमध्ये ईश्वरवती र सागरलाई गिरफ्तार गरेको थियो।
आरोपित ईश्वरवतीकी छोरी हालसम्म फरार रहेको प्रहरी निरीक्षक विजय यादवले बताए। आरोपितहरुले कर्तव्य गरी हत्या गरेको भन्दै पीडित पक्षले भदौ २९ गते जिल्ला प्रहरी कार्यालयमा कर्तव्य ज्यान मुद्दा दर्ता गरेका थिए। रासस
