बलियो निर्वाचन क्षेत्रको खोजीमा रहेका एनेकपा माओवादीका उपाध्यक्ष नारायणकाजी श्रेष्ठले अन्तत: मकवानपुरको क्षेत्र नं. २ छानेका छन् ।
काठमाडौँ तथा तराईका विभिन्न निर्वाचन क्षेत्रको आँकलन गरेपछि नारायणकाजीको मन अन्ततः मकवानपुर गएर थामिएको छ । पार्टीले पनि उनकै इच्छा अनुसार मकवानपुर क्षेत्र नं. २ का लागि पार्टीको तर्फबाट आगामी संविधानसभामा उम्मेदवार तोकेको छ । थाहा आन्दोलनका प्रवर्तक रुपचन्द्र विष्टको प्रिय जिल्ला मकवानपुर धेरै लामो समय देखि वामपन्थि राजनितिको गढ रहदै आएको छ ।
गत संविधानसभा निर्वाचनमा एनेकपा माओवादीले मकवानपुर जिल्लाका चारवटै निर्वाचन क्षेत्र जितेको थियो । मकवानपुर २ बाट प्रेमबहादुर पुलामीले आफ्ना निकटतम प्रतिद्वन्दि नेकपा एमालेका वीरबहादुर लामालाई झण्डै साढे छ हजार मतले हराएका थिए । पुलामीले १६ हजार ९ सय ७६ मत ल्याएका थिए भने लामाले १० हजार २ सय २१ मत मात्र ल्याएका थिए ।
श्रेष्ठको गृह जिल्ला गोरखा हो । गत संविधानसभा निर्वाचनमा भने उनी प्रत्यक्ष तर्फवाट चुनावमा लडेका थिएनन् । मकवानपुर २ बाट नेपाली कांगे्रसका जयराम लामिछाने तथा एमालेका सुवास ठकुरी लड्दै छन् । निर्माण व्यवशायी लामिछाने केही महिना अघिमात्र नेपाली कांग्रेस प्रवेश गरेका हुन ।
