नेपाल सद्भावना पार्टी (गजेन्द्रवादी)ले आसन्न संविधानसभा निर्वाचनमा मधेसको ३० निर्वाचन क्षेत्रबाट उम्मेदवारी दिने घोषणा गरेको छ। राजविराजमा सम्पन्न पार्टीको केन्द्रीय समितिको बैठकले उक्त घोषणा गरेको हो।
नेसपा (गजेन्द्रवादी)का अध्यक्ष विकास तिवारी सप्तरीको २ नम्बर क्षेत्रबाट चुनाव लड्ने भएका छन्। यसैगरी पार्टीका महासचिव राजकिशोर मिश्र बाँकेको निर्वाचन क्षेत्र नम्बर २ बाट, सह महासचिवहरु मो. कलाम आजाद बाराको ४ बाट, लालविहारी राय यादव सर्लाहीको ४ बाट र मदन झा रौतहटको १ नम्बर क्षेत्रबाट चुनाव लड्ने आज यहाँ आयोजित पत्रकार सम्मेलनमा जानकारी दिइयो।
यसैगरी पार्टीका केन्द्रीय सदस्यहरु अशोकलाभ कर्ण सुनसरी ५ बाट, भुपनारायण राम सर्लाही ६ बाट, चन्द्रमोहन चौधरी सर्लाही ३ बाट, विन्देश्वर यादव बारा ३ बाट, सतेन्द्रसिंह पर्सा २ बाट र दानी मण्डल सप्तरी ३ बाट चुनाव लड्ने बताइएको छ।
अन्य जिल्लाबाट चुनाव लड्नेको नाम भने सार्वजनिक गरिएको छैन। चुनावी अभियानका लागि सह महासचिव लालविहारी राय यादवको संयोजकत्वमा केन्द्रीय सदस्यहरु भूपनारायण राम, अशोकलाभ कर्ण, सतेन्द्र सिंह र सावित्री पण्डित सदस्य रहेको प्रचारप्रसार समितिसमेत गठन गरेको छ।
केही दलहरुले निर्वाचनलाई बिथोल्ने धम्की दिएको भन्दै निर्वाचनको विपक्षमा रहेका राजनीतिक दललाई पनि सहभागी गराई भयमुक्त वातावरण कायम गर्न सरकारसँग बैठकले माग गरेको पार्टीका अध्यक्ष विकास तिवारीले बताए। रासस
