२०४६ सालमा जनआन्दोलनबाट प्रजातन्त्र पुनस्र्थापना भएपछि अन्तरिमकालमा कृष्णप्रसाद भट्टराई प्रधानमन्त्री बने। समयमै संविधान बनाउन सफल र अन्तरिमकाललाई छिट्टै निकासमा पुर्याएको जस पाएका भट्टराईले वाहवाही बटुले।
प्रजातन्त्र पुनस्र्थापनापछिको पहिलो चुनाव २०४८ सालमा कांग्रेसले काठमाडौं– १ बाट उनैलाई चुनावमा उठायो।
लामो भूमिगत राजनितिबाट भर्खरै खुला भएको नेकपा मालेका होनहार नेता थिए मदन भण्डारी। पछि माले–एमाले मिले, भण्डारी महासचिव बने।
तिलस्मी भाषणले लट्ठ पार्न सक्ने खुबी थियो भण्डारीमा। गजबको व्यक्तित्व भएका कम्युनिष्ट नेता भण्डारीलाई एमालेले प्रधानमन्त्रीसमेत रहेका भट्टराईविरुद्ध उम्मेदवार बनायो।
भण्डारीले जिते।
एमालेले नै भन्ने गरेको रहस्यमयी दासढुङगा घटनामा परी भण्डारीको निधन भयो। एमालले उनको ठाउँमा श्रीमती विद्यादेवी भण्डारीलाई उम्मेदवार बनायो। कां्रग्रेसले पनि भट्टराईलाई नै उम्मेदवार बनायो।
जित फेरि भण्डारीकै भयो।
त्यसपछिको संसदीय चुनावमा पनि एमालेले आफ्ना प्रभावशाली नेता प्रदीप नेपाललाई क्षेत्र नम्बर एकबाट उठायो, जिते।
संविधानसभाको पहिलो चुनावमा कांग्रेसले जिते पनि एमालेको लागि काठमाडौं– एक महत्वपूर्ण चुनावी मैदान हो।
कुनैबेला कांग्रेसका प्रभावशाली नेता चर्चित र सफल प्रधानमन्त्रीलाई समेत हराउन सफल भएको त्यही चुनावी मैदानमा एमालले अहिले एकजना कलाकारलाई उम्मेदवार बनाएको छ– भुवन केसी । नेपाली चलचित्रमा तीन दशकको अभिनय अनुभव भएका केसी २०६८ सालमा एमाले प्रवेश गरेका हुन् माधव नेपालको हातबाट टिका लगाएर।
केसीले केही हप्ताअघि कमल थापाको पार्टीमा जाने भनेर घुर्की लगाएपछि एमालेले उनलाई उम्मेदवार दिउँला भनेर फकायो । अभिनेता केसीले रोजेकै ठाँउमा आफूलाई पार्टीले उठाएको बताएका छन्।
‘मैले रोजेकै क्षेत्र हो यो, पार्टीले मलाई विश्वास गरेर टिकट दिएको छ, म आभारी छु,’ उनले सेतोपाटीसँग भने, ‘मलाई विश्वास छ, जनताहरूले पनि मलाई विश्वास गर्ने छन्, उनीहरूकै मायाले म चुनाव जित्ने छु।’
पार्टी प्रवेश गरेकै बेला आफूले सक्रिय राजनीतिमा लाग्ने योजना बनाएको उनले बताए। ‘मैले लामो समय चलचित्रमा काम गरेर जसरी चलचित्र क्षेत्रको विकासमा काम गरेको थिएँ,’ अभिनेता केसीले भने, ‘पार्टी प्रवेश गरेको बेला अव सक्रिय राजनीति गर्छु भनेको थिएँ, पार्टीले मलाई विश्वास गरेको छ।’
उनले यसो भनिरहँदा एमालेका जिल्ला अध्यक्षसहितका पदाधिकारीले भने केसीलाई उम्मेदवार बनाएकामा असन्तुष्टि जनाउँदै आफ्नो पदबाट राजीनामा गरिरहेका थिए। अभिनेता केसीले भने, ‘म राजनीतिमा भाषण गर्न आको होइन, सकेसम्म देश र जनताको लागि समर्पित भएर काम गर्छु, नेपाली युवा कामका लागि विदेश जान नपरोस्, जलस्रोतको धनी हाम्रो देशमा अँध्यारो नहोस् भनेर मैले काम गर्ने छु।’
चुनाव जित्नुभयो भने संविधान बनाउन कस्तो योगदान दिनुहुन्छ?
‘म खासमा कलाकारको प्रतिनिधित्व गरेर चुनावमा आएको हुँ, हाम्रो देशको कला, संस्कृति, साहित्य, चलचित्रजस्ता क्षेत्रलाई विश्वसामु चिनाउने प्रयास गर्ने छु,’ उनले भने।