नेकपा एमालेले आगामी संविधानसभाको चुनावमा काठमाडौं क्षेत्र नम्बर १ बाट अभिनेता भुवन केसीलाई प्रत्यक्षमा टिकट दिएपछि नेकपा एमाले काठमाडौंका क्षेत्रीय कमिटिका सदस्यले राजीनामा दिएका छन्।
यसअघि काठमाडौं क्षेत्र नम्बर १ बाट कानुनवीद् विदुर मैनालीलाई दिने भनिएको भएपनि शीर्ष नेताहरु त्यसलाई उल्ट्याउँदै केसीलाई टिकट दिएपछि काठमाडौंका क्षेत्रीय सभापति भानुभक्त घिमिरे, उपाध्यक्ष कृष्ण खरेललगायतका २९ जनाले क्षेत्रीय समितिबाट राजीनामा दिएका हुन्।
यसैगरी सो समिति अन्तर्गत रहेका विभिन्न चारवटा साखा कमिटिहरुका सदस्यले पनि राजीनामा दिएको कमिटिका एक सदस्यले सेतोपाटीलाई बताए।
उनीहरुले भोलिदेखि नै क्षेत्रीय पार्टी कार्यालयमा तालाबन्दी गर्ने, प्रत्यक्षमा पार्टीले बनाएको उमेद्वारलाई भोट नहाल्नेलगायतका आन्दोलनका कार्यक्रम पनि सार्वजनिक गरेका छन्।
काठमाडौं क्षेत्र नम्बर एक बाट उम्मेद्वारमा परेका अभिनेता भुवन केसी एमालेमा संलग्न भएपनि गतहप्ता राप्रपा नेपालमा प्रवेश गर्ने हल्ला चलेको थियो। त्यसपछि पार्टीका केन्द्रीय सदस्यले टिकट दिने आश्वासन दिएर एमालेमै रहन आग्रह गरेका थिए।
यस्तै यसभन्दा अगाडि एमाओवादीको चुनावी गीतका लागि अभिनय गर्ने भन्दै पैसासमेत लिइसकेका थिए। पछि एमालेले उम्मेद्वार बनाउने पक्का भएपछि उनले त्यो रकम फिर्ता गरेका थिए।