निर्वाण चौधरीले विद्युतीय कारोबार ऐनअनुसार ५५ करोड माग दाबी गरी कारबाही माग गर्न भनेका पत्रकार दिनेश आचार्यलाई जिल्ला अदालत काठमाडौँले २० हजार धरौटीमा छाड्ने भएको छ।
जिल्ला अदालत काठमाडौँमा भएको बयान र थुनछेक बहसपछि न्यायाधीश अर्जुन अधिकारीको इजलासले आचार्यलाई २० हजार धरौटी मागेको हो।
सेयरबजार साप्ताहिकलले असारको ९–१५ को अंकमा निर्वाण चौधरीको निजी जीवनको समाचार छापेर त्यसलाई सम्पादक आचार्यले फेसबुकमा सेयर गरेका थिए। त्यसरी फेसबुकमा आफ्नाबारे समाचार सेयर गरेर आफ्नो चरित्र हत्या गर्न खोजेको भन्दै व्यापारी विनोद चौधरीका छोरा निर्वाण चौधरीले ५५ करोड क्षतिपूर्ति माग गर्दै महानगरीय प्रहरी परिसरमा उजुरी दिएका थिए।
प्रहरी परिसर काठमाडौँले उजुरीमा अनुुसन्धान गरी अभियोजनका लागि सरकारी वकिल कार्यालयलाई पठाएको थियो।
आचार्यले विद्युतीय कारोबार ऐनको दफा ४७ बमोजिमको कसुर गरेको भन्दै सजाय माग दाबी गर्न प्रहरीले सरकारी वकिललाई आफ्नो रायसहितको प्रतिवेदन पठाएको थियो। सोही रायका आधारमा सरकारी वकिल कार्यालयले काठमाडौँ जिल्ला अदालतमा मुद्दा दायर गरेको थियो। अदालतले आचार्यलाई अदालतमा पेश गर्न भनेपछि प्रहरीले उनलाई सोमबार पक्राउ गरी अदालतमा पुर्याएको थियो।
मंगलबार भने जिल्ला अदालतले उनलाई धरौटी माग गरेको हो ।
चौधरीले पत्रिकामा आएको समाचारको खण्डन पनि नगरी उक्त समाचारलाई फेसबुक पेजमा सेयर गरेकामा आपत्ति जनाउँदै प्रहरीमा उजुरी दिएका हुन्।