नेपाली कांग्रेसको सिफारिसमा परेका दुई उम्मेदवारलाई पार्टीको निर्णय निल्नु न ओकल्नु भएको छ।
संसदीय समितिले सोमबार रातभरि बैठक बसी मंगलबार बिहानसम्म प्रत्यक्षतर्फ उम्मेदवारीको छिनाफानो गरेको थियो। मंगलबार बिहान फोन गरी आफ्नो सिफारिसपत्र बुझ्न बोलाइएका प्यूठान– १ र २ का हुकुमबहादुर बिष्ट र देवीराम पुन पार्टी कार्यालय सानेपा पुगेपछि जिल्लिए। नेताहरूले प्युठान यी दुवै आकांक्षीहरूलाई उनीहरूका ठाउँमा श्रीमतीलाई उम्मेदवारी छाड्न आग्रह गरेपछि बिष्ट र पुनको टाउको घुम्यो।
नेताहरूको भनाइले आक्रोशित भएर कार्यालय परिसरमा उभिएका बिष्ट र पुनले पार्टी उपसभापति रामचन्द्र पौडेल बाहिरिन गाडीमा बसिसकेका बेला एकसाथ गुनासो गर्दै भने, ‘नेताहरूले हामीलाई घोर अन्याय र अपमान गर्नुभयो ।’
उनीहरूले एकै स्वरमा भने, ‘हामीले टिकट अपेक्षा गर्ने अनि श्रीमतीहरूलाई निर्वाचन लड भन्ने ?’
उनीहरूलाई आफ्नै श्रीमतीलाई टिकट छाड्न गरेको आग्रह चित्तै बुझेन। भने, ‘जिल्ला र क्षेत्रबाट पनि सिफारिस नभएकालाई छाड भन्दैमा हामी यो निर्णय कसरी स्वीकार गर्ने?’
उनीहरूले पौडेललाई निर्णय सच्याउन आग्रह गरे।
जवाफमा पौडेलले महिला सहभागिता कम भएकाले पनि बिष्ट र पुनका श्रीमतीहरूलाई टिकट दिइएको जानकारी दिँदै पार्टी निर्णय मान्न आग्रह गरे। ‘२४० जनाको प्रत्यक्षतर्फ महिलाको संख्या कम भए हामी सबैको उम्मेदवारी नै रद्द हुने अवस्था आएकाले यस्तो निर्णय भएको हो,’ पौडेलले भने।
बिष्ट र पुन भने रन्थनिरहकै थिए। उनीहरूले आफ्ना श्रीमतीहरूलाई उठाउन पनि नसक्ने र जिताउन पनि नसक्ने बताए।
बिष्टका अनुसार उनकी श्रीमती पार्टी राजनीतिमा सक्रिय हुनुका साथै जिल्लाबाट महासमिति सदस्य पनि हुन् र उनले पनि क्षेत्रमा उम्मेदवारी दिन कोशिस गरेकी थिइन्। तर, क्षेत्रले श्रीमान– श्रीमती दुवैलाई सिफारिस गर्न नसक्ने भनी श्रीमतीको नाम पठाएन। पुनकी श्रीमती भने राजनीतिमा सक्रिय छैनन्।
यसअघि कांग्रेसले मंगलबार बिहानमात्र आधा दर्जनभन्दा बढी क्षेत्रको सिफारिसमा परेका नाममा टिकट दिने निर्णय गरी पत्र बुझिसकेका उम्मेदवारहरूसँगबाट समेत पत्र फिर्ता गर्न लगाएको थियो। सभापति सुशील कोइरालाले सिफारिसपत्रमा हस्ताक्षर गरिरहँदा कतिपय ठाउँमा मिलाउने भन्दै महामन्त्री कृष्णप्रसाद सिटौला र पार्टी सदस्य मिनेन्द्र रिजाल नामहरू हेरफेर गरिरहेका थिए।
त्यसरी फिर्ता गरेको उजुरी सुनेपछि कार्यालयमा बसिरहेका उपसभापति पौडेलले ठट्टा गर्दै आफ्नो सहयोगीलाई भने, ‘ए चिरञ्जीवी! तल हेर है, फेरि मेरो पनि नाम कटाएर अर्कैको राखिदेलान् नि।’
कांग्रेस केन्द्रीय सदस्य सुरेन्द्र पाण्डे गोरखा– २ बाट सिफारिस भएकामा उनको नाम काटिएको छ। उनको ठाउँमा हरिकला खनाललाई टिकट दिइएको छ।
