नेपाली कांग्रेसले लामो कसरत र विवादबीच टिकट बाँड्न सुरू गरेको छ। कांग्रेस पार्टी कार्यालय सानेपामा बसेको शीर्ष नेतृत्वको रातभरिको कसरतले सबै जिल्लाको छिनोफानो गर्दै टिकट बाँड्न सुरु गरेको हो। यसैबीच हिमाली र पहाडी जिल्लाका नेताहरूबाट टिकट बाँड्न सुरू गरेको छ। अन्य जिल्लाका लाई पनि बोलाउँदै वितरण गर्दै गरिरहेको छ।
अत्याधिक विवाद रहेको तनहुँ र स्याङ्जामा भने टिकटको छिनोफानो गर्ने जिम्मा सम्बन्धित जिल्लाका शीर्ष नेतालाई नै दिइएको छ। तनहुँको विवाद मिलाउने जिम्मा पार्टी उपसभापति रामचन्द्र पौडेलले पाएका छन् भने स्याङ्जाको विवाद सल्ट्याउने जिम्मा गोपालमान श्रेष्ठलाई दिइएको छ।
पार्टी कार्यालय सानेपामा पार्टीका केन्द्रीय सभापति सुशील कोइरालाले हिमाली र पहाडी जिल्लाका उमेद्वारलाई सिफारिसपत्र दिँदै सम्बन्धित जिल्ला गएर चुनावी प्रचारमा होमिन आग्रह गरेका छन्।
यसैबीच तनँहु, धादिङ, चितवन, गोरखाजस्ता जिल्लाहरुको टिकट वितरणमा नेतृत्वले आफ्नो नातावाद र कृपावादको गलत दुरूपयोग गरेको भन्दै सम्बन्धित जिल्लाका नेता कार्यकर्ता विरोधमा उत्रिएका छन् ।
शीर्ष नेतृत्वविरुद्ध नाराबाजी गर्दै निर्णय तत्काल सच्याउन नेतृत्व तहसँग माग पनि गरेका छन्। यसैबीच चितवन जिल्ला क्षेत्र न.३ मा पार्टीका पूर्वजिल्ला सभापति विकास कोइरालाको नाम करिब करिब फाइनल गरिएकोमा नेतृत्व तहले उनको नामको सट्टा पार्टीका पुराना नेता भीमबहादुर श्रेष्ठलाई टिकट दिएको छ।
भीमबहादुरलाई टिकट दिएको विरोधमा विकास समर्थक कार्यकर्ताले विरोध जनाएका छन्। उनीहरू पार्टी कार्यालय परिसर बाहिर नाराबाजी गर्दै तुरुन्त निर्णय सच्याउन दबाब दिइरहेका छन्।
यसैबीच नेपाली कांग्रेसले ४० वर्ष भन्दा तलका ५ जनालाई मात्र टिकट दिएको छ। ४० वर्ष भन्दा कम उमेरमा टिकट पाउनेमा काठमाडौं २ बाट प्रतिमा गौतम, काठमाडौं ४ बाट गगन थापा, लमजुङ १ बाट टकराज गुरूङ, काभ्रे १ बाट तिर्थ लामा र कालिकोटबाट भुपेन्द्रजंग शाही छन् ।