जिल्ला निर्वाचन कार्यालयले यही फागुन १४ गतेदेखि यहाँका छवटै नगरपालिकामा तस्बिरसहितको मतदाता नामावली सङ्कलन अभियान सुरु गर्ने भएको छ।
कार्यालयले मंगलबार यहाँ आयोजना गरेको तस्बिरसहितको मतदाता नामावली सङ्कलन तथा अद्यावधिकसम्बन्धी अन्तक्र्रिया कार्यक्रममा जिल्ला निर्वाचन अधिकृत उमेश अधिकारीले फागुन २५ गतेसम्म अभियान सञ्चालन गरिने जानकारी दिए।
अभियानमा विगतमा सङ्कलन गरिएको नामावलीमा भएको त्रुटि सच्याउने तथा नयाँ नामावली सङ्कलन गरी तस्बिर खिचेर मतदाता परिचयपत्र वितरण गरिने छ। यसका लागि कार्यालयले छ नगरपालिकामा ३५ मतदाता नामावली सङ्कलन केन्द्र कायम गरेको छ। सबभन्दा धेरै भक्तपुरमा ११ र मध्यपुरथिमिमा आठ तथा अनन्तलिङ्गेश्वर, नगरकोट, चाँगुनारायण र सूर्यविनायकको संयुक्त वडा कार्यालयमा चार चारका दरले केन्द्र कायम गरिएको छ।
कार्यालयले तीन टोली बनाएर फागुन १७ गतेसम्म अनन्तलिङ्गेश्वर, चाँगुनारायण र नगरकोट, १८ गतेदेखि २१ सम्म सूर्य्विनायक, १८ देखि २५ गतेसम्म मध्यपुरथिमिमा तथा १८ देखि २५ गतेसम्म भक्तपुर नगरपालिकाका विभिन्न वडामा मतदाता नामावली सङ्कलन गर्ने भएको छ।
त्यसैगरी नामावली सङ्कलन फागुन १४ गतेदेखि २५ गतेसम्म भए पनि प्रत्येक केन्द्रमा एक दिन मात्रै नामावली सङ्कलनको काम गरिने भएकाले छुटेकाहरुले अर्को दिन नजिक रहेको केन्द्रमा वा जिल्ला प्रशासन कार्यालय र निर्वाचन कार्यालयमा बिदाका दिन बाहेक १० देखि ५ बजेसम्म तस्बिर खिंचेर मतदाता परिचयपत्र बनाउन सकिने व्यवस्था गरिएको छ।
मतदाता नामावली सङ्कलन एक एक दिन हुने भए पनि त्रुटि सच्याउने कार्य भने आजदेखि नै सुरु हुने भएको छ। कार्यक्रममा प्रअिज तेजप्रसाद पौडेलले नामावली सङ्कलन गर्नका लागि सबै नागरिकलाई जानकारी दिन स्थानीय निकाय र कार्यालयले प्रचार गर्नुपर्नेमा जोड दिए।
स्थानीय विकास अधिकारी पशुपतिबाबु पुरीले गाउँ गाउँमै अभियान सञ्चालन हुने भएकाले सेवाग्राहीलाई अवसरको सदुपयोग गर्न आग्रह गरे।
विसं २०६७ देखि तस्बिरसहितको मतदाता परिचयपत्र बनाउने अभियान सुरु भएकामा गत संविधानसभा निर्वाचनमा भक्तपुरमा एक लाख ५७ हजार तस्बिरसहितको मतदाता नामावली सङ्कलन भएकामा ८५ प्रतिशतले मतदान गरेको, जसमा ९७ प्रतिशत मत सदर भएको र तीन प्रतिशत मद बदर भएको कार्यालयले जनाएको छ। रासस