एकीकृत नेकपा माओवादीका अध्यक्ष पुष्पकमल दाहालले राउटेहरुको मासिक भत्ता बढाउन सरकारसँग छलफल गर्ने बताएका छन्। अछामबाट आएको राउटेहरुको प्रतिनिधि मण्डलसँगको आज बिहान कुराकानी गर्दै उनले यस्तो बताएका हुन्। अध्यक्ष प्रचण्ड प्रधानमन्त्री भएको समयमा राउटेहरुलाई सरकारले मासिक १ हजार रुपैयाँ भत्ताको व्यवस्था गरेको थियो ।
राउटेहरुले ५ हजार रुपैयाँ मासिक भत्ता पुर्याइदिन आग्रह गरेका थिए । उनीहरुले तत्कालका लागि आफ्नो समुदायको कूल पुजा भएकोले केही खर्चको व्यवस्था गरिदिन, दीर्घकालिन रुपमा समुदायको स्वास्थ्य, सुरक्षा र खाध्यान्नको व्यवस्था लगायतका मागहरुका बारेमा पनि सरकारसँग पहल गरिदिन अध्यक्ष प्रचण्ड समक्ष अनुरोध गरेको थिए ।
सो अवसरमा अध्यक्षले खसी सहयोग लिने भन्दा खसी नै पाल्ने, बालबच्चाहरुलाई विद्यालय पठाउने, मासिक भत्ताको व्यवस्था गर्ने, सुरक्षा दिने, स्वास्थ्य सेवाका लागि घुम्ती स्वास्थ्य टोलीको व्यवस्था गर्ने लगायतका सुधार आवश्यक रहेकोले सो विषयमा सरकारमा पहल गर्ने बताए। पार्टीका सचिव तथा उर्जा मन्त्री टोपबहादुर रायामाझीले राउटे समुदायलाई शिक्षा स्वास्थ्यको व्यवस्था गरी आधुनिक बसाई तिर लैजानु पर्ने धारणा राखे। पार्टी स्थायी समिति सदस्य तथा वनमन्त्री अग्निप्रसाद सापकोटाले राउटेहरुले वन मन्त्रालयबाट बन रक्षकका लागि पाउँदै आएको रोकिएको तलब सुचारु गर्ने बताए।