उपप्रधानमन्त्री तथा स्थानीय विकासमन्त्री कमल थापाले सरकारले स्थानीय निकायको मिति चाँडै सार्वजनिक गर्ने बताएका छन्।
दुई महिनादेखि स्थानीय निकायको निर्वाचनको मिति चाँडै तोकिने उल्लेख गर्दै आएका उपप्रधानमन्त्री तथा स्थानीय विकासमन्त्री थापाले राजनीतिक दलहरूसँग छलफल गरेर मिति सार्वजनिक गरिने बताए।
कास्कीको कालिका गा.वि.स. वडा नं ६ र पोखरा उपमहानगरपालिका वडा नं २२ लाई जोड्न विजयपुर खोलामा निर्मित पक्की पुलको शुक्रबार उद्घाटनका क्रममा मन्त्री थापाले लामो समयदेखि स्थानीय निकायको निर्वाचन नहँदा विकास निर्माणका काम प्रभावित भएकाले सरकारले निर्वाचनका लागि छलफल अगाडि बढाएको बताए।
उपप्रधानमन्त्री तथा स्थानीय विकासमन्त्री थापाले विकास निर्माणका काममा राजनीतिकरण गर्न नहुने भन्दै सबैको सहयोग आवश्यक पर्ने बताए। कास्की जिल्ला विकास समितिले स्थानीय सडक पुल कार्यक्रम अन्र्तगत एक करोड ८९ लाख ११ हजार रुपैयाँमा ३७ दशमलव २५ मिटर लम्वाइको पुल निर्माण गरेको हो। पुल निर्माणसँगै कालिका गाविसको आर्थिक विकासमा सहयोग पुग्ने स्थानीयवासीले बताएका छन्।