प्रधानमन्त्री केपी शर्मा ओलीले भारत भ्रमणका क्रममा आफूले विवादास्पद् सम्झौता नगर्ने पनि बताएका छन्। विहिवार काठमाडौंमा अनेरास्ववियुको २२ औं महाधिवेशन उद्घाटनका क्रममा प्रधानमन्त्री ओलीले मुलुकको सार्वभौमिकता, स्वतन्त्रता, भौगोलिक अखण्डता र स्वाभिमानमा आँच आउने गरी भारतसँग कुनै सम्झौता नगर्ने भन्दै मुलुकको सर्वोपरि हितलाई प्राथमिकता दिने बताए।
प्रधानमन्त्री ओलीले प्रमुख प्रतिपक्षी नेपाली काँग्रेसलाई सरकारमा आउन आह्वान गरेका छन्। प्रधानमन्त्री ओलीले प्रधानमन्त्री पद्मा आफूसँगै प्रतिस्पर्धा गरेका नेपाली काँग्रेसका सभापति सुशील कोइरालाको निधन भएको तेस्रो दिन काँग्रेसलाई सरकारमा सहभागी हुन सार्वजनिक रुपमा आव्हान गरेका हुन। प्रधानमन्त्री ओलीले विहिवार काठमाडौंमा अनेरास्ववियुको २२ औं महाधिवेशन उद्घाटनका क्रममा काँग्रेसले सरकारबाहिर बसेर गर्न खोजेको राजनीति आफूले बुझ्न नसकेको बताए। उनले राप्रपा नेपालजस्तो फरक राजनीतिक आस्था राख्ने दल समेत सरकारमा सहभागी भएको अवस्थामा लोकतन्त्रमा विश्वास राख्ने काँग्रेस सरकार वाहिर वस्नुको औचित्य नरहेको बताए।
प्रधानमन्त्री ओलीले कार्यभार सम्हालेको २ वर्ष नपुग्दै २०७४ सालको असार मसान्तसम्म मुलुकलाई तुइनमुक्त बनाइसक्ने दाबी समेत गरे। उनले पदबहालीका क्रममा गत असोजको अन्तिममा मुलुकलाई २ वर्षभित्र तुइनमुक्त बनाउने घोषणा गरेका थिए।। उनले आफूले घोषणा गरे अनुसार नै योजना बनाउने काम भइरहेको भन्दै २०७४ सालको साउन १ गते मुलुकका कुनै पनि स्थानमा तुइन नदेखिने दाबी गरे।
प्रधानमन्त्री ओलीले आफूले गरेका प्रतिबद्धतालाई हावादारी गफ भनेर उडाइए पनि एक वर्षभित्र कुनै हालतमा लोडसेडिङ हटाएर देखाउने दाबी गरे।
