पूर्वप्रधानमन्त्री तथा नेपाली कांग्रेस सभापति स्वर्गीय सुशील कोइरालाको बुधवार राजकीय सम्मानका साथ अन्त्येष्टि गरिँदै छ। सरकारको निर्णयानुसार सोमबार राति निधन भएका पूर्वप्रधानमन्त्री कोइरालाको अन्त्येष्टि बुधवार राजकीय सम्मानका साथ गर्न लागिएको हो।
कोइरालाको राजकीय सम्मानका साथ अन्त्येष्टिको जिम्मा भने सरकारले नेपाली सेनालाई दिएको छ। मन्त्रिपरिषदको आकस्मिक बैठकले पूर्वप्रधानमन्त्री कोइरालाको अन्त्येष्टि राजकीय सम्मानका साथ गर्ने र त्यसको तयारी गर्न गृह र रक्षा मन्त्रालयलाई निर्देशन दिएको थियो।
सोही अनुसार कोइरालाको राजकीय सम्मानका साथ अन्त्येष्टिको जिम्मा नेपाली सेनालाई दिइएको हो। त्यसका लागि सेनाका एक टुकडी खटेको छ। सो टुकडीले दशरथ रंगशालाबाट कोइरालाको पार्थिव शरीर उठाउँदा राष्ट्रिय गानको धुनसहित सलामी दिनेछ। ब्यान्ड बाजासहित सेनाको त्यो टुकडी कोइरालाको शवयात्रासँगै पशुपति अार्यघाट पुग्नेछ। कोइरालाको पार्थिव शरीरमा दागबत्ति दिने बेलामा उनको सम्मानमा राष्ट्रिय गानको धुन बजाउनुका साथै नेपाली सेनाको टुकडीले १३ तोपको समामी अर्पण गर्नेछ।
कोइरालाको अन्त्येष्टि उनका आफन्त र परिवारको चाहाना बमोजिम हिन्दु संस्कार अनुसार नै गरिने छ। सैनिक प्रवक्ता ताराबहादुर कार्कीले सेतोपाटीसित भने, ‘हाम्रो एउटा टुकडी जान्छ। प्रोसेसनमा सहभागी हुन्छ। १३ तोपको सलामी चढाउँछ।’
