नेपाली काँग्रेसका सभापति एवं पूर्वप्रधानमन्त्री सुशील कोइरालाको निधनमा दक्षिणी छिमेकी भारतले दुःख व्यक्त गरेको छ।
भारतले कोइरालाको निधनमा दुःख व्यक्त गर्न विदेशमन्त्री सुष्मा स्वराज र प्रधानमन्त्री नरेन्द्र मोदीका राष्ट्रिय सुरक्षा सल्लाहकार अजित डोभललाई नेपाल पठाएको छ। मंगलबार अपरान्ह पाँच बजेर २५ मिनेटमा त्रिभुवन अन्तर्राष्ट्रिय विमानस्थलमा उत्रिएको विदेशमन्त्री स्वराज र सुरक्षा सल्लाहकार डोभलसहितको टोलीले साँझ दशरथ रंगशाला पुगेर कोइरालाप्रति श्रद्धाञ्जली अर्पण गरेको छ।
स्वराजको टोली केही मिनेट बत्तीसपुतलीस्थित द्धारिकाज होटलमा बसेर श्रद्धाञ्जलीका लागि रंगशाला पुगेको हो। कोइरालाको पार्थिव शरीरमा श्रद्धाञ्जली अर्पण गर्ने भारतीय टोलीमा नेताहरु सीताराम यचुरी, शरद यादव र आनन्द शर्मा पनि छन्।
विदेशमन्त्री स्वराज नेतृत्वको भारतीय टोली श्रद्धाञ्जली अर्पणलगत्तै रंगशालाबाट वाहिरिएको थियो। रंगशालाबाट निस्किएको भारतीय टोलीले बालुवाटार पुगेर प्रधानमन्त्री केपी शर्मा ओलीसँग शिष्टाचार भेट गरी कोइरालाको निधन भएकामा दुःख व्यक्त गरेको छ।
साढे चार महिना लामो नाकाबन्दीपछि भारतीय उच्च नेतृत्व पहिलो पटक काठमाडौ आएको हो। संविधान जारी भएको तेस्रो दिनदेखि नेपालमाथि अघोषित नाकाबन्दी लगाएको भारतले १ सय ३५ औं दिनमा गत शुक्रबार अघोषित रुपमा नै नाकाबन्दी हटाएको थियो। भारतीय टोलीले समय अभावका कारण उपप्रधानमन्त्री तथा परराष्ट्रमन्त्री कमल थापासँग सिंहदरबारमा भेट गर्ने कार्यक्रम भने अन्तिम समयमा स्थगित गरेको थियो।
भारतीय विदेशमन्त्री नेतृत्वको टोली मंगलबार राति नै दिल्ली फर्कने कार्यक्रम छ।