नेपाली कांग्रेस काठमाडौ क्षेत्र नम्बर ४ मा भएको क्षेत्रिय अधिवेशन तथा महाधिवेशन प्रतिनिधिको निर्वाचनमा कांग्रेस केन्द्रीय सदस्य गगन थापा पक्ष हाबी भएको छ। निर्वाचनबाट कांग्रेसको महामन्त्रीमा लड्ने घोषणा गरेका केन्द्रीय सदस्य गगन थापा पक्षका ८ जना महाधिवेशन प्रतिनिधिमा निर्वाचित भएका हुन्।
अधिवेशनको मतपरिणाम अनुसार १२ मध्ये ८ जना थापा पक्षीय नेताहरु महाधिवेशन प्रतिनिधिमा निर्वाचित भएका हुन्।
यस्तै क्षेत्रीय समितिमा पनि थापा पक्षकै बहुमत सदस्य निर्वाचित भएका छन्। क्षेत्रीय समितिमा सभापतिमा बाहेकका सबै पदमा थापा पक्षधर नेताहरु विजयी भए। तर सभापतिमा भने देउवा पक्षका राजु श्रेष्ठले बाजी मारेका छन्। राजुले सभापतिमा आफ्नै आफन्त पर्ने अघिल्लो कार्यकालका क्षेत्रिय सभापति न्हुच्छेनारायण श्रेष्ठलाई ४ मतले पराजित गरेका हुन्।
सभापतिमा यसपटक पराजय भोगेका न्हुच्छेनारायण श्रेष्ठले अघिल्लो महाधिवेशनमा देउवा पक्षीय नेता राजु श्रेष्ठलाई नै पराजित गरेका थिए।
को-को निर्वाचित भए महाधिवशेन प्रतिनिधिमा?
महाधिवेशन प्रतिनिधि निर्वाचित भएका १२ जना मध्ये चिरिन्जीवी निधि तिवारी, शैलेश सिटौला,साधुराम खड्का, सुशील नाहाटा, विमल भित्राकोटी, अनार बस्नेत, लाक्पा लामा, कर्माछिरिङ शेर्पा, नरोत्तम बैद्य र जानुका घिमिरे थापा पक्षीय अर्थात संस्थापन पक्षीय हुन्।
देउवा पक्षका भने क्षेत्रिय सभापति राजु श्रेष्ठ र आत्माराम पौडेलमात्रै निर्वाचित भए।