उपप्रधानमन्त्री तथा ऊर्जामन्त्री टोपबहादुर रायमाझीले मधेसवादी दलको आन्दोलन र भारतीय नाकाबन्दीका बाबजुत पनि वर्षौंदेखि रोकिएका आयोजनाको काम अगाडि बढेको भन्दै लोडसेडिङको समय अब बढ्न नदिने बताएका छन्।
उपप्रधानमन्त्री तथा ऊर्जामन्त्री रायमाझीले नेपाल हेभी इक्विपमेन्ट व्यवसायी संघको छैटौं साधारणसभाको शनिबार काठमाडौंमा उद्घाटन गर्दै लोडसेडिङको समय बढ्न नदिने बरु विस्तारै घटाउने बताएका हुन्।
उनले वर्षौंदेखि रोकिएको ढल्केबर—मुजफ्रपुर ४ सय केभी प्रसारण लाइन निर्माणको काम सम्पन्न भएको भन्दै यो प्रसारण लाइनमाफृत अब केही दिनभित्रै भारतबाट ८० मेगावाट विद्युत आयात गरिने र लोडसेडिङको समय घट्ने बताए।
उनले घटेको लोडसेडिङको समय कहिल्यै बढ्न नदिने भन्दै त्यसका लागि निर्माणाधीन आयोजनाका कामलाई तिब्रता दिने बताए। उनले निर्माणाधीन आयोजनाहरुमा फस्ट ट्रयाकबाट काम गर्नका लागि मन्त्रालयले एक साताभित्र वृहत योजनासहित उर्जा संकटकाल घोषणा गर्ने बताए।
उपप्रधानमन्त्री तथा उर्जामन्त्री रायमाझीले उर्जा मन्त्रालयले ल्याउन लागेको वृहत योजनामा १० वर्षभित्र १० हजार मेगावाट विद्युत उत्पादन गर्ने विषयलाई समावेश गरिने र योजना अनुसार नै आयोजनाहरुको कामलाई तिब्रता दिइने बताए।