पाँच महिनादेखि ठप्प रहेको मुलुकै ठूलो भन्सार नाका रक्साैल खुलेलगतै प्रधानमन्त्री केपी शर्मा ओली र एकीकृत नेकपा माओवादीका अध्यक्ष पुष्पकमल दाहाल प्रचण्डले सद्भावना पार्टीका अध्यक्ष राजेन्द्र महतोलाई धन्यवाद दिएका छन्।
शुक्रबार अपरान्ह वीरगञ्ज नाका खुलेको खबर सार्वजनिक भएसँगै उनीहरुले महतोलाई नाकाबन्दी खोलिदिएकोमा धन्यवाद दिएका हुन्।
शुक्रवार दिउँसो विराटनगर रहेका बेला महतोलाई प्रधानमन्त्री ओली र अध्यक्ष प्रचण्डले टेलिफोन गरेर धन्यावाद दिएको महतो निकट स्रोतले जानकारी दियो। उनीहरुले महतोलाई ‘तपाईले नाकाबन्दी खुल्नु पर्छ भनी अभिव्यक्ति दिएको भोलिपल्टै वीरगन्ज नाका खुलेछ।’ भन्दै धन्यवाद दिएको स्रोतले बतायो। महतोले बिहीबार बिराटनगरमै अरु सबै नाका खुलाएर वीरगञ्ज नाकामात्र बन्द गर्नुको औचित्य नभएको अभिव्यक्ति दिएका थिए।
प्रधानमन्त्री र प्रचण्डले महतोलाई छिटो काठमाडाैं आएर मोर्चा र तीन दल मिलेर समस्याको समाधान गर्न आग्रह गरेका थिए। महतोले आफ्ना माग र मधेसका मुद्दाप्रति इमानदार हुनुपर्ने बताए। टेलिफोन कुराकानीमा महतोले सीमांकन आफूहरुको प्रमुख मुद्दा भएकाले यसमा सरकार र प्रमुख तीन दलको प्रतिबद्धता आउनुपर्ने बताएका थिए।
प्रचण्डले सीमांकन सच्याउन आफूहरु तयार रहेको भन्दै महतोलाई जतिसक्दो चाँडो राजधानी आएर समस्याको निकासमा लाग्न आग्रह गरे। प्रचण्डले सम्बादका माध्यमबाट निकास खोज्न सकिने बताएको स्रोतले बतायो। प्रचण्डले फोन गरेको केही समयपछि प्रधानमन्त्री ओलीले महतोलाई फोन गरेका थिए।
ओलीले नाकाबन्दीले तस्करी मौलाएको र जनता पीडित भएको भन्दै महतोलाई नाकाबन्दी खोलेर सकारात्मक काम गरेको भन्दै धन्यवाद दिएका थिए।
ओलीले पनि सीमाकंन फेरबदलमा प्रमुख दल सकारात्मक भएको बताए। उनले सकारात्मक समाधानका लागि आग्रह गरे।
