सत्तारुढ नेकपा एमालेका नेता माधवकुमार नेपालले पार्टी अध्यक्ष एवं प्रधानमन्त्री केपी शर्मा ओलीमाथि पार्टीलाई मनपरि ढंगले चलाएको र विधिहरु सबै भत्काएको आरोप लगाएका छन्।
अनेरास्ववियुको भूगोल जिल्ला कमिटीले शुक्रबार काठमाडौमा गरेको कार्यक्रममा नेता नेपालले अध्यक्ष एवं प्रधानमन्त्री ओलीमाथि योग्यता र क्षमताका आधारमा नभइ निकटताका आधारमा जिम्मेवारी दिएको आरोप लगाए। उनले क्षमता नै नभएकाहरुलाई मन्त्री बनाएर पुरष्कृत गरेको आरोप लगाउँदै अध्यक्षको मनपरि नसहने चेतावनी दिए।
नेता नेपालले पार्टी अध्यक्ष ओलीको मनपरि सहन नसकी वाध्य भएर आफूले पनि गुट संचालन गरेको भन्दै पार्टीमा ओली गुटभन्दा आफ्नो गुट मजबुत रहेको दाबी गरे। उनले पछिल्लो पटक १८ वटा जिल्लामा भएको अधिवेशनमा आफ्नो गुटले बर्चस्व हासिल गरेको भन्दै ओली गुटसँग नआत्तिन अनेरास्ववियुका कार्यकर्तालाई आग्रह गरे।
उनले ओली गुटसँग नआत्तिइ अनेरास्ववियुको नयाँ नेतृत्वका लागि सहमतिका आधारमा जतिसक्दो चाँडो उम्मेद्वार तय गर्न पनि आफूपक्षीय विद्यार्थीहरुलाई आग्रह गरे। उनले उम्मेद्वार तय गर्न ढिला गर्दा विगतमा आफ्नो विपक्षमा परिणाम आएका घटना सुनाउँदै तत्काल उम्मेद्वारहरु घोषणा गरेर प्यानल नै जित्ने गरी एक ढिक्का भएर खटिन निर्देशन समेत दिए।
नेपालले पार्टी अध्यक्ष ओलीले दिने निर्देशन पालना नगर्न समेत आफू पक्षीय विद्यार्थीहरुलाई निर्देशन दिए। ओलीले विद्यार्थीलाई लुटेरा र ठग बनाउने गरी जथाभावी निर्देशन दिन थालेको उहाँको आरोप छ।
कार्यक्रममा नेपाल पक्षीय विद्यार्थी नेताहरु दिपक गौतम, थोमस बाँस्तोला लगायतले ओली पक्षले अनेरास्ववियुको आसन्न सम्मेलनका लागि दुई वटा पार्टीबीचको प्रतिस्पर्धा हुन लागेको झल्को दिने गतिविधि गरेको आरोप लगाउँदै आफ्नो पक्षको जित सुनिश्चित रहेको दाबी गरेका थिए । एमालेको विद्यार्थी संगठन अनेरास्ववियुमा नयाँ नेतृत्व चयनका लागि यहि माघ २७ गतेदेखि काठमाडौमा २२ औं राष्ट्रिय सम्मेलन हुँदैछ।
