मधेसी मोर्चाको आन्दोलनका कारण विगत पाँच महिनादेखि ठप्प रहेको वीरगन्ज नाकाको अबरोध हटेको छ। अबरोध हटेसँगै शुक्रबार दिउँसोदेखि वीरगन्ज नाकाबाट भारतीय मालबाहक गाडीहरु नेपाल भित्रिने क्रम सुरु भएको छ।
मितेरी पुलमा पाल टाँगेर बसेका आन्दोलनरत मधेसी मोर्चाका कार्यकर्ता र बस्नका लागि टाँगेका पालहरु स्थानीयबासी र व्यापारीले हटाएपछि शुक्रवार दिउँसोदेखि वीरगन्जको रक्सौल नाका सुचारु भएको हो।
नाका खुलेसँगै भारतबाट मालबाहक गाडीहरु नेपाल भित्रिएका छन्। सहायक प्रमुख जिल्ला अधिकारी मनोज भण्डारीले पनि नाकाबाट नेपाल गाडीहरु भित्रिएको र पूर्णरुपमा भने नाका खुल्ने क्रममा रहेको बताए।
उनका अनुसार नाकाबाट मितेरी पुल हुँदै केही साना मालबाहक गाडीहरु सहजै नेपाल भित्रिएका छन्। उनले नाकामा कुनै अबरोध नरहेको पनि ठूला सवारीका साधान भने नाकाबाट नेपाल भित्रिन नसकेको बताए।
नाका खुलेसँगै नाकामा सुरक्षा व्यवस्था कडा पारिएको छ। मधेसी मोर्चाको आन्दोलनका कारण विगत पाँच महिनादेखि वीरगन्जको रक्सौल नाका ठप्प रहँदै आएको थियो। आन्दोलनका कारण ठप्प रहेका अन्य नाका भने यसअघि नै सञ्चालनमा आइसकेका छन्।