एकीकृत माओवादीका नेता हेमन्तप्रकाश वलीले अध्यक्ष पुष्पकमल दाहाल प्रचण्ड निकटको एउटा गरोह आफूलाई पारिवारिक कुरासँग जोडेर सिध्याउन खाजेको आरोप समेत लगाएका छन् । सेतोपाटीसँग कुराकानी गर्दै उनले भने–परिवारको समस्या, पारिवारिक कुरा पार्टीगत कुरा हुँदैन त्यो निजी मामिला हुन्छ । तर मलाई मेरो निजी मामिला देखाएर कारबाही गरेर सिध्याउने काम भयो।’
घटना के हो त्यो छानविन नै नगरेर आफूलाई कारबाही गरेको भन्दै नेता वलीले अंश समेत दिएर छुट्टिसकेको अवस्थामा पनि साँस्कृतिक विचलन पुर्याउने काम गरेको भन्दै कारबाही गरेर आफूलाई सिध्याउन खोजिएको वताए।
उनले पार्टी भित्र छानविन गर्न गठन भएका शेरचन र बोगटी आयोगका कुरा लुकाएर प्रचण्डले आफूलाई कारबाही गरेर अन्याय गरेको आरोप लगाए । उनले भने–शेचरनर आयोग बोगटी आयोगले ल्याएको कुरा प्रचण्डजीले लुकाउने ? अनि कानुनको डण्डा लगाउनु परे म जस्ता निर्दोष माथि लगाउने?
साँस्कृति विचलन हुने काम गरेको भन्दै वलीलाई एमाओवादी केन्द्रीय समितिको पुस पहिलो साता बसेको बैठकले तीन महिनाका लागि साधारण सदस्यसमेत नरहने गरी कारबाही गरेको थियो । तीन महिने कारबाहीमा परेका वलीले लामो समयदेखि पार्टीमा आफूले बैचारिक कुरा राख्दै आएको भएपनि आफूलाई पारिवारिक कुरासँग जोडेर सिध्याउन खाजेको भन्दै पार्टी छोड्ने निर्णय लिन आफू बाध्य भएको वताए।
वैद्य वा विप्लव दुवैतिर सम्भावना खुल्लै छ
अब एमाओवादी छोडेपछि कुन पार्टीमा जानु हुन्छ भन्ने प्रश्नको उत्तर दिँदै वलीले भने–‘अब कुन पार्टीमा भन्नेबारे सोचिरहेको छु । नेकपा–माओवादीका अध्यक्ष मोहन बैद्य मेरो गुरु नै हो । विप्लवजी तिर पनि बाटो खुल्ला नै छ । दुर्इ मध्ये जता जान पनि सक्छु । तर अहिले नै त्यो निष्कर्षमा भने पुगेको छैन,वलीले भने।’ तर उनले वैद्य नेतृत्वको माओवादीमा पनि जाने सम्भावना कायमै रहेको वताए ।
एमाओवादी कम्युनिष्ट पार्टी नै रहेन
एमाअोवादी अध्यक्ष प्रचण्डले संशोधनवादी दस्तावेज ल्याएको आरोप लगाउँदै उनले भने–‘समाजवादी क्रान्ति भन्ने अनि संशोधनवादी दस्तावेज ल्याउनु अन्तरविरोधपूर्ण कुरा हो । यस्तो कुरा मानेपछि माओवादी कम्युनिष्ट पार्टी नै भएन। त्यही भएर म बस्न चाँहिन।’
