इस्वी सम्बतअनुसार आजबाट अंग्रेजी नयाँ वर्ष सन् २०१६ सुरु भएको छ । नयाँ वर्षको स्वागत संसारभर विभिन्न कार्यक्रम गरिएको छ । नेपालमा पनि विभिन्न कार्यक्रमसहित खुशीयालीका साथ नयाँ वर्षको स्वागत गरिएको छ ।
नयाँ वर्षको स्वागतमै काठमाडौँको ठमेल, भक्तपुरको नगरकोट, चितवनको सौराहा, पोखरा लगायत ठूला शहरहरुमा विशेष सांगीतिक कार्यक्रम आयोजना गरिएको थियो । सन् २०१५मा भए गरेका कामको समीक्षा गर्दै नयाँ वर्षमा नयाँ योजना पनि बनाउने गरिन्छ ।
यसैवीच प्रधानमन्त्री केपी शर्मा ओलीले अंग्रेजी नयाँ वर्षले नेपालीवीचको एकतालाई अझै बलियो बनाउने विश्वास व्यक्त गरेका छन्।
प्रधानमन्त्री ओलीले अंग्रेजी नयाँ वर्ष २०१६ को अबसरमा शुभकामना सन्देश दिँदै अंग्रेजी नयाँ वर्षले नेपालीबीचको हार्दिकता र एकतालाई अझै बलियो बनाउने विश्वास व्यक्त गरेका हुन् ।
प्रधानमन्त्रीको निजी सचिवालयले जारी गरेको विज्ञप्तिमा नयाँ वर्षले संविधानले व्यवस्था गरेका अधिकारको व्यवहारमा कार्यान्वयन गर्न प्रेरणा प्राप्त हुन सकोस् भन्ने उल्लेख छ।
ओलीले मुलुकमा अहिले देखिएका जटिलता र समस्या समाधान गर्दै मुलुकलाई आर्थिक समृद्धिको दिशामा अघि बढाउन सबैमा आह्वान समेत गरेका छन् ।