भारतको अघोषित नाकाबन्दी र तराई आन्दोलनले मुलुक जर्जर भएका बखत सर्वसाधारणलाई कुराएर प्रधानमन्त्री केपी ओलीका लागि बिहीबार ढेड घन्टा जहाज 'होल्ड' गरिएको छ। ढेड घन्टाअघि नै विराटनगरबाट उड्नुपर्ने यती एयरलाइन्सको जहाज प्रधानमन्त्री आउन ढिला भएको भन्दै होल्ड गरिएको हो।
गृहजिल्ला झापाबाट आएको ओलीसहित कानुन मन्त्री अग्नि खरेल, एमाले महासचिव ईश्वर पोखरेल तथा सुरक्षागार्डका ढिलो गरी आउँदा सुरक्षाकर्मीले जहाज कुराएका थिए। अपराह्न ४ः३० बजे नै उड्नुपर्ने एतीको जहाज साँझ ५ः५० बजे उडेको थियो।
यतीमा टिकट काटेका सर्वसाधारण यो समयअवधिभर रुँघेर बसेका थिए। साढे पाँच बजे आसपास विमानस्थल पुगेका प्रधानमन्त्री र मन्त्रीहरू भने कार्यकर्तासँग फोटोसेसनमा व्यस्त भए।
उच्च सुरक्षा स्रोतका अनुसार प्रधानमन्त्री आउन ढिलो हुने जानकारी आएपछि जहाज रोकाइएको हो। जहाजमा भिआईपी, सुरक्षाकर्मी र सर्वसाधारण कति थिए भन्ने विवरण लुकाइएको छ।
यती एयरलाइन्स विमानस्थलको व्यवस्थापन हेरिरहेकी मनिषा श्रेष्ठले यात्रु तथा भिआईपीहरूको विवरण दिन मानिनन्। 'यो विवरण दिन मिल्दैन, माथि नै सोध्नुपर्छ,' उनले भनिन्। उनका अनुसार भिआईपीहरू नै धेरै भएकाले जहाज रोकाइएको हो।
यात्रुहरूलाई डेढ घन्टा अगाडिदेखि नै सुरक्षा चेकजाँचका लागि भित्र छिराइएको थियो। उच्च ओहोदाका व्यक्तिलाई यसअघि पनि बारम्बार जहाज रोक्ने गरिएको थियो तर यति लामो समय भने रोकाइएको थिएन।
मोरङका निमिक्त प्रमुख जिल्ला अधिकारी एकदेव अधिकारीले प्रधानमन्त्रीका लागि जहाज होल्ड गरिएकोबारे जानकारी नभएको प्रतिक्रिया दिए। 'जहाज रोक्न लगाइएको हो भन्ने हामीलाई जानकारी छैन,' उनले भने, 'एयरलाइन्सले पनि हामीलाई भनेको छैन।'
यसैबीच, कांग्रेस बरिष्ठ नेता शेरबहादुर देउबाले भारतले हिन्दुराज्यको कुरा गरेको स्पष्ट पारेका छन्। संविधान बन्नुअघि भ्रमणमा गएका बखत भारतले हिन्दुराज्यबारे कुरा गरेको तर हिन्दुराज्य नहुने परिस्थितिबारे आफूले जानकारी गराएको देउबाले बताए।
'हिन्दुराज्यको कुरा गरेकै हो, तर संविधानसभामा बहुमत पुर्याउनुपर्छ भनेको थिएँ,' विमानस्थलमा सञ्चारकर्मीसँग कुरा गर्दै देउबाले भने, "कांग्रेसमात्रले बहुमत नपुग्ने परिस्थिति थियो।'
