गोरखाको बक्राङका भूकम्पपीडितलाई बाँड्न कम्मल हस्तान्तरण गर्दै भट्टराई। तस्वीर : प्रशन्न पोखरेल/गोरखा।
नयाँ शक्ति अभियानका संयोजक तथा पूर्व प्रधानमन्त्री बाबुराम भट्टराईले केपी शर्मा ओली नेतृत्वको अहिलेको सरकार राजतन्त्र बिनाको पञ्चायत जस्तो भएको टिप्पणी गरेका छन्। गणतन्त्र, संघीयताजस्ता मुख्य परिवर्तनका बिरोधी कमल थापाको पछि लागेर एमाओबादीलगायत कम्युनिष्टहरु बिग्रेको भन्दै भट्टराईले सत्ता टिकाउन ओलीले मन्त्रालय टुक्राएर भाडबन्डा गरेको बताए।
‘जाडोको बेला छ। भूकम्पपीडित मरिरहेका छन्। न्यानो कपडा बाँड्ने, घर बनाउन पैसा दिने काम गर्नुको सट्टा मन्त्रालय फूटाएर भोज भतेर गर्ने?' गोरखाको मनकामनामा आइतबार आयोजित पत्रकार सम्मेलनमा बोल्दै भट्टराईले भन्ो, ‘सरकारको गतिबिधिले मलाई साह्रै लञ्जित बनायो।' उपप्रधानमन्त्री तथा परराष्ट्रमन्त्री कमल थापाले नाकाबन्दीलगायत समस्याको सही समाधान खोज्नै नसक्ने दावी गर्दै भट्टराईले सरकारको कुबुद्धिले गर्दा नाकाबन्दी लम्बिएको ठोकुवा गरे।
‘कमल थापाले संबिधानको ब्याख्या गर्ने? अनि कम्युनिष्टहरु निरीह हुँदै उनकै पछिपछि लाग्ने?' उनले भन्ो, ‘संघीयता, धर्मनिरपेक्षता र गणतन्त्रलगायत परिवर्तनका बिरोधीले संबिधानको ब्याख्या गर्न सुहाएन।' मधेशी मोर्चाले नाकाबन्दी गर्ने संकेत गत भदौ महिना मै गरेको भन्दै भट्टराईले ओलीले सत्तामा पुग्न हतार गर्दा समस्या थपिएको आरोप लगाए।
मधेशबादी दललाई नाकाबन्दका कार्यक्रम फिर्ता गरेर शान्तिपूर्व सत्याग्रहका कार्यक्रम गर्न भट्टराईले अनुरोध गरेका छन्। ‘मधेशबादी दलहरुसंग मेरो औपचारिक, अनौपचारिक कुराकानी भैरहेको छ' उनले भने, ‘सार्थक वार्ता हुनु जरुरी देख्छु।' सिमाङकनमा देखिएको मतभेद आयोगमार्फत् टुंगो लगाउन सकिने भट्टराईको तर्क गरेका छन्।
शान्ति र संबिधानको कार्यभार पूरा गर्न आफ्नो प्रधानमन्त्री कालमा १६ दललाई साथ लिएर ४९ जना मन्त्री बनाउनुपरेको भट्टराईले प्रष्ट पारे। ‘म प्रधानमन्त्री भैसकेको मान्छे, मलाई थाह छ कि मन्त्री थपेर केही हुँदैन' उनले भने, ‘दुःखद भन्नुपर्छ मेरो पालामा पनि ४९ जना मन्त्री भए। को–को मन्त्री भए मैले नै चिन्दैनथ्ों।' साथै भट्टराईले मन्त्रालय टुक्राउने होइन समायोजन गर्नुपर्नेमा जोड दिएका छन्।
उपेन्द्र यादव, अशोक राई नेतृत्वको पार्टीसंग सहकार्य गर्ने नभई नयाँ जगमा नयाँ पार्टी गठन गर्ने भट्टराईको भनाइ छ। युवा पंक्तिको मोह नयाँ शक्तिमा देखिएको भन्दै भट्टराईले केही महिना भित्रै पार्टी गठन गर्ने संकेत गरे। दशौं हजार जनताको सहभागितामा गठन हुने पार्टी देशकै बैकल्पिक शक्ति हुने भट्टराईले दावी गरे। पढेलेखेका मानिसलाई राजनीतिमा आउन आग्रह गर्दै उनले राजनीति फोहोर खेल नभएको प्रष्टाए।
यसअघि भट्टराईले बक्राङ गाबिस भूकम्पपीडितलाई भेटेर बिकासमुखी राजनीतिका लागि सघाउन आग्रह गरेका थिए। घर बनाउन सरकारले दुई लाख बाँड्न ढिलाइ गरेकोमा सरकारको चर्को आलोचना गर्दै भट्टराईले जनताको दुःखमा साथ दिन आफू सधै तयार रहेको बताए। आफू सांसद नभए पनि पूर्व प्रधानमन्त्रीको हैसियतले बिकास निर्माणका काममा सहयोगी बन्ने उनको प्रतिबद्धता थियो।
भट्टराईले बक्राङ गाबिसका भूकम्पपीडितलाई उनले चाउचाउ र कम्मल पनि बितरण गरे। बक्राङ हुँदै मनकामना पुगेका भट्टराई ताङ्लीचोक, मकैसिङ हुँदै आज फुजेलमा बास बस्ने कार्यक्रम तय भएको नयाँ शक्ति अभियान गोरखा संयोजक रमेश पोखरेलले बताए। गोरखाको क्षेत्र नं. १ का बिभिन्न गाबिस घुमेर भट्टराई भोली राजधानी फर्कने कार्यक्रम छ।
