अर्थमन्त्री विष्णु पौडेलले इन्धनमा भारतमा मात्र निर्भर नरहनका लागि धादिङको गल्छीदेखि रसुवाको रसुवागढीसम्म दुई लेनको द्रुत सडक बनाइने बताएका छन्।
मिडिया इन्टरनेशनलले सोमबार काठमाडौमा गरेको अन्तर्क्रियामा अर्थमन्त्री पौडेलले गल्छीबाट बेत्रावती- मैलुङ हुँदै रसुवागढीसम्म २ वर्षभित्र दुई लेनको कालोपत्रे सडक बनाउने बताए। उनले यस बारेमा आफूले सरोकारवाला मन्त्रालयका उच्च अधिकृतहरुसँग छलफल गरिरहेको र केही दिनभित्रै मन्त्रीपरिषद्ले निर्णय गर्ने जानकारी दिए।
पौडेलले केही दिनपहिले मात्र उपप्रधानमन्त्री एवं भौतिक पूर्वाधार तथा यातायातमन्त्री विजयकुमार गच्छदारसँगै रसुवागढी नाकाको अवलोकन गरेका थिए। अर्थमन्त्री पौडेलले बेत्रावतीबाट राम्चे, मूलखर्क हुँदै धुन्चे जाने सडकको भौगोलिक अवस्था राम्रो नरहेको र दूरी पनि लामो भएकाले आफू बेत्रावतीबाट मैलुङ हुँदै स्याफ्रुबेसीसम्म सडक खोल्नुपर्ने पक्षमा रहेको बताए। बेत्रावतीबाट मैलुङ हुँदै स्याफ्रुबेसीसम्मको दूरी २८ किलोमिटर छ। उनले बेत्रावती-स्याफ्रुबेसी खण्डमा ६ किलोमिटर ट्रयाक खोल्न बाँकि रहेको भन्दै नेपाली सेनालाई ट्रयाक खोल्ने जिम्मेवारी दिने बताए। संसद्को विकास समितिले आइतबार मात्र रसुवागढीलाई अर्न्तराष्ट्रिय नाकाको रुपमा विकास गर्नका लागि बेत्रावती-धुन्चेको सट्टा बेत्रावती-स्याफ्रुबेसी सडकलाई उच्च प्राथमिकता दिएर द्रत गतिमा काम गर्नुपर्ने सुझाव सहितको प्रतिवेदन सभामुख ओनसरी घर्तीलाई बुझाएको थियो।
अर्थमन्त्री पौडेलले भारतको नाकाबन्दी अन्त्यका लागि सरकारले राजनीतिक र कुटनीतिक तवरमा वार्ता गरिरहेको भन्दै वार्ताको छिट्टै परिणाम देखिने बताए। अन्तर्क्रियामा नेपाल उद्योग वाणिज्य महासंघका उपाध्यक्ष दिनेश श्रेष्ठ र नेपाल बैंकर्स संघका अध्यक्ष उपेन्द्र पौडेलले नाकाबन्दीका कारण मुलुकको अर्थतन्त्रमा भुकम्प गएका बेला भन्दा पनि ठूलो क्षति भएको भन्दै नाकाबन्दी र मधेश आन्दोलन अन्त्य गर्नेतर्फ ध्यान केन्द्रीत गर्न सरकारसँग आग्रह गरेका थिए।