भारतीय नाकाबन्दी र सीमा सुरक्षा बलको ज्यादतिको विरोधमा धरानमा सोमबार सत्तारुढ दल एमालेको जनवर्गीय संगठनहरुले प्रदर्शन गरेका छन्।
युवा संघ नेपाल एक नम्बर क्षेत्रीय समितिको अगुवाईमा निस्एिको प्रदर्शनमा सयौंको संख्यामा कार्यकर्ता तथा जनता सहभागी बने। धरान–४ स्थित पार्टी कार्यालयबाट सुरु भएको प्रदर्शन छाताचौक, महेन्द्रपथ हुँदै भानुचोकमा आएर कोणसभामा परिणत भएको थियो।
कोणसभालाई सम्बोधन गर्ने अधिकांस युवा नेताहरुले भारतीय नाकाबन्दीको चर्को विरोध मात्रै गरेनन् उनीहरुले एसएसबीको ज्यादति विरुद्ध सिरुपाते खुकुरी उचाल्न तयार रहेको उद्घोषसमेत गरेका छन् ।
‘एसएसबी यही रुपमा नेपाल प्रवेश गर्ने हो भने सिरुपाते बोकेर लाखौं युवाहरु भारत छिर्न तयार छन्।’ क्षेत्रीय अध्यक्ष विनोद राईले कोणसभालाई सम्बोधन गर्दै भारतलाई चेतावनी दिँदै भने ।
उनले मोदी सरकारलाई सीमा जोगाउनको लागिसमेत चेतावनी दिँदै भने हस्तक्षेप बन्द गर्दा हुन्छ हैन भने आजैबाट मेचिदेखि महाकाली, तराई, पहाड, हिमालसम्मका लाखौं युवाहरु सीमामा धर्ना दिने छन्।’
कोणसभामा अनेरास्ववियुका केन्द्रीय सदस्य टिका माङ्ले लिम्बूले मधेशी आन्दोलनको नाममा देशलाई टुक्राउन नपाइने र त्यस विरुद्ध युवाहरु उठ्ने बताए।
