अर्थमन्त्री विष्णु पौडेलले मुलुक वैशाखको भुकम्पको मारबाट उभिन नपाउंदै भारतको नाकाबन्दीका कारण अनपेक्षेित संकटको सामना गर्नुपरेको बताएका छन्। मुलुक अहिले गम्भिर र अप्ठ्यारो अवस्थाबाट गुज्रिरहेको र यो संकट समाधानको लागि राजनितिक र कुटनितिक तवरबाट प्रयास भइरहेको पौडेलले बताए।
अर्थमन्त्रीको जिम्मेवारी वहन गरेपछि पहिलो पटक गृहजिल्ला रुपन्देही आएका पौडेलले प्रेस चौतारी नेपाल रुपन्देहीले भैरहवा विमानस्थलमा गरेको पत्रकार भेटघाट कार्यक्रममा बोल्दै सरकार अहिलेको संकट समाधान र आपूर्ति व्यवस्थालाई सहज पार्ने दिशामा केन्द्रित भएको बताए।
पौडेलले दुईतिहाई मात्र होइन त्योभन्दा पनि ठूलो समर्थनमा संविधानसभाबाट जारी गरिएको संविधान लोकतन्त्रका हिसाबले पनि सबैभन्दा उत्कृष्ट संविधान भएको र यसका कारण भारतले नाकाबन्दी गर्नुपर्ने कुनै कारण नभएको बताए।
'नेपालले आफ्नो लागि आफ्नै हिसाबले संविधान जारी गर्दा हामीले के गल्ती गर्यौं, नेपाली जनताले जनताले के गल्ती गरे, नेपाल राष्ट्रले के गल्ती गर्यो र वर्तमान र विगतको सरकारले पनि के गल्ती गर्यो र आज मुलुकले नाकाबन्दीको सामना गर्नुपरेको छ' उनको प्रश्न थियो।
मधेशी मोर्चाले राखेका जायज माग पूरा गर्न सरकार तयार रहेको बताउँदै तर राष्ट्रियता, जनजिवीका, राष्ट्रिय अखण्डता र सार्वभौमताको बारेमा भने कसैसंग कुनैपनि सम्झौता गर्न नसकिने बताए।
नेकपा एमालेका उपमहासचिव समेत रहेका मन्त्री पौडेलले प्रदेशको सीमांकन अन्तिम नभएको र यसलाई आवश्यकताको आधारमा संशोधन समेत गर्न सकिने बताउंदै त्यसको लागि आयोग मार्फत तथा संसदीय आयोग बनाएर पनि पुनर्विचार गर्न सकिने बताए।
यसैविच अर्थमन्त्री पौडेलले नाकाबन्दीका कारण उत्पन्न अभावको कारण देखाउंदै कुनैपनि सेवाग्राहीलाई सेवा प्रदान गर्नमा आलटाल नगर्न कर्मचारीहरुलाई निर्देशन दिएका छन् ।
जिल्ला प्रशासन कार्यालय रुपन्देहीमा जिल्लाका सुरक्षा निकाय, कार्यालय प्रमुख तथा संघसंस्थाका प्रमुखहरुसंगको अन्तरकृया कार्यक्रममा मुलुक अप्ठ्यारो अवस्थामा रहेको बेला बढि कर्तव्य परायण र कर्तव्यनिष्ट जिम्मेवारी पुरा गर्न निर्देशन दिए ।
जनताले धेरै बोलेको होइन बोल्नुभन्दा काम गरेको हेर्न र देख्न चाहेको भन्दै अर्थमन्त्री पौडेलले जनता, राजनितिक दल, संघसंस्था र सबै कार्यालयहरुलाई साथमा लिएर राजमार्ग, भन्सार नाका, व्यापारिक कारोबार र शैक्षिक संस्था कतैपनि अवरोध नहुन् भन्ने तवरबाट काम गर्न सुरक्षा निकायलाई निर्देशन दिए ।
यसैविच अर्थमन्त्री पौडेलले बेलहिया भन्सार कार्यालयको पनि निरिक्षण गर्दै त्यहांको पछिल्लो अवस्थाको बारेमा जानकारी लिएका छन्।
अर्थमन्त्री पौडेलले सीमामा भएको अवरोध हटाउने विषयमा केन्द्रिय स्तरबाट राजनितिक र कुटनितिक तवरबाट प्रयासहरु भईरहेको बताउँदै स्थानीय स्तरमा पनि पहल गर्न स्थानीय प्रशासन तथा भन्सार अधिकृतलाई आग्रह गरे।
