संघीय समावेशी मधेशी गठबन्धनले वीरगंजमा शनिवार नेपाली कांग्रेसले निकालेको र्याली विथोलेर झण्डा जलाएको छ। कांग्रेस नगरकार्य समितिले पार्टीको झण्डा र ब्यानर सहित मधेश आन्दोलनको समर्थनमा निकालेको ¥याली विथोल्दै गठबन्धनले झण्डा जलाएको हो। जारी मधेश आन्दोलनमा सहभागी मधेशवादी दलहरुले पार्टीको झण्डा त्यागेर मात्र कालो झण्डा बोकेको अवस्थामा कांग्रेसले पार्टीको झण्डा सहित ¥याली निकालेर आन्दोलनमा घुसपैठ गर्न खोजेको गठबन्धनको आरोप रहेको छ।
मधेश विरोधी संविधान जारी गर्ने कांग्रेसले आन्दोलन तुहाउन घुसपैठको रुपमा पार्टीको झण्डा सहित ¥याली निकालेको गठबन्धनका नेता राजेशमान सिंहले बताए । उनले साँच्चै मधेश आन्दोलनमा सहभागी हुने हो भने नेपाली कांग्रेसबाट राजीनामा दिएर कालो झण्डा समाउन आफूहरुको चुनौति रहेको बताए। नेपाल सदभावना पार्टीको केन्द्रीय सदस्य शिव पटेलले आन्दोलनमा समर्थन जनाउनु राम्रो पक्ष भएपनि पार्टीको झण्डा सहित सडकमा देखिनु मधेस आन्दोलनलाइ कब्जा गर्न खोज्नु भएकाे बताए ।
माईस्थानमा जम्मा भएका कांग्रेसका नेता कार्यकर्ताहरुले बोकेको झण्डा र ब्यानर खोसेर जलाएपछि गठबन्धनका नेता कार्यकर्ताहरुले नेपाली कांग्रेस मुर्दाबाद, घुसपैठ बन्द गर जस्ता नारा समेत लगाएर नगरको परिक्रमा गरेका थिए ।
