मधेश आन्दोलन राजनीतिक समस्या भएको भन्दै वार्तामार्फत तत्काल आन्दोलन सम्बोधन गर्नुपर्ने माग सहित काठमाडौमा प्रदर्शन गरिएको छ।
नागरिक सञ्जालको नाममा शनिबार अपरान्ह माइतीघरदेखि नयाँ वानेश्वरसम्म प्रदर्शन गरिएको हो। मधेशवादी दलले आन्दोलन थालेको एक सय दिन नाघिसक्दा पनि उनीहरुका माग सम्बोधनका लागि सरकार गम्भीर नभएको भन्दै सञ्जालले प्रदर्शन गरेको हो।
प्रदर्शनमा पूर्वप्रधानमन्त्री डा. बाबुराम भट्टराई र एकीकृत नेकपा माओवादीका उपाध्यक्ष नारायणकाजी श्रेष्ठदेखि मधेशका वुद्धिजीवीसम्मले सहभागीता जनाएका छन्। मधेश आन्दोलनका कारण जनताले भोकभोकै बस्नुपर्ने अवस्था आएपनि यसतर्फ सरकार सम्वेदनशील नभएको प्रदर्शनकारीहरुको आरोप छ। प्रदर्शनमा सहभागीहरुले सरकार कहाँ छ? वार्तामार्फत समस्याको समाधान खोज्न किन ढिलाइ? लगायका प्रश्नसहितका प्लेकार्ड प्रदर्शन गरेका थिए। प्लेकार्डसहितको र्याली नयाँ वानेश्वर पुगेपछि गरिएको सभाका वक्ताहरुले जनताले पाएको कष्टका विषयमा सरकार र संसद् मौन बसेको भन्दै आपत्ति जनाए। उनीहरूले मधेशवादी दलको आन्दोलन र आन्दोलनलाई कारण देखाएर भारतले गरेको नाकाबन्दीले ग्याँस, पेट्रोल, खाद्यान्न लगायतको अभाव हुँदा आमजनताले भोकभोकै मर्नुपर्ने अवस्था आएपनि सरकार र संसद्ले समस्याको समाधान खोज्न गम्भिरता नदेखाएको आरोप लगाए।
प्रदर्शनकारीहरुले अभावको नाममा मौलाएको कालोबजारी नियन्त्रण गर्न तथा भुकम्पबाट क्षतिग्रस्त संरचनाहरुको पुनर्निमाण सम्बन्धी विधेयक तत्काल पारित गरेर पुनर्निमाणको काम सुरु गर्न सरकारको ध्यानाकर्षण समेत गराएका छन्।