प्रधानमन्त्री केपी शर्मा ओलीले अर्धचेत अवस्थामा रहेका राष्ट्रिय जनमुक्ति पार्टी पूर्वमहासचिव एवं पूर्वमन्त्री गोरेबहादुर खपाङ्गी मगरको स्वास्थ्य अवस्थाबारे जानकारी लिएका छन्।
ललितपुरको नख्खु दोबाटोस्थित उहाँको डेरामा शनिबार पुगेर प्रधानमन्त्री ओलीले उनको स्वास्थ्यस्थितिबारे जानकारी लिएपछि प्रधानमन्त्री ओलीले उनको परिवारलाई सरकारका तर्फबाट गर्न सक्ने सबै प्रकारको सहयोग उपलब्ध गराइने प्रतिबद्धता व्यक्त गरे।
एमाले उपाध्यक्ष वामदेव गौतम र सूचना तथा सञ्चार प्रविधिमन्त्री शेरधन राईका साथ प्रधानमन्त्री ओली पूर्वमन्त्री खपाङ्गीलाई भेट्न त्यहाँ पुगेका थिए।
विसं २०६९ वैशाख १२ गते काठमाडौँको प्रदर्शनीमार्गमा मोटरसाइकलको ठक्करबाट लडेर अशक्त खपाङ्गीको चार पटक शल्यक्रिया भइसकेको छ। सुरुमा वीर अस्पताल, न्युरो अस्पताल र नर्भिक अस्पताल हुँदै सिङ्गापुरसम्म पु¥याएर उनको उपचार गरिए पनि स्वास्थ्य अवस्था भने आवश्यक सुधार हुन नसकेको परिवारले जनाएको छ। टाउकामा लागेको गम्भीर चोटका कारण उनको शरीरको एकापट्टिको भाग चल्दैन भने उनी बोल्न सक्दैनन्।
उदयपुरमा जन्मेर महोत्तरीको रामनगरमा शिक्षा हासिल गरेका खपाङ्गी रामेछापको गौरीशङ्कर माविमा केही समय प्रअ भएको बेला पञ्चायतविरुद्ध गतिविधिमा संलग्न भएको आरोपमा स्थानीय प्रशासनले जिल्ला निष्काशन गरेको थियो। सोलगत्तै उनलाई जलेश्वर कारागारमा बन्दी तुल्याइएको थियो ।
एकहत्तर वर्षीय खपाङ्गीको उपचारका लागि हालसम्म शुभचिन्तक, आफन्तले सहयोग पु¥याउँदै आएका छन्। हालसम्म उनको उपचारका लागि रु एक करोड ७५ लाख खर्च भइसकेको छ। उनी २०५८ सालमा महिला बालबालिका तथा समाजकल्याण मन्त्रीसमेत थिए।
अस्वस्थ अवस्थामा रहेका खपाङ्गीलाई खिलराज रेग्मी नेतृत्वको सरकारले दुई पटक गरी रु पाँच लाख सहयोग उपलब्ध गराएको परिवारले जनाएको छ। रासस