शनिबार लाजिम्पाटमा भारतीय दूतावासका कन्सुलर चढ्ने गाडीमा आगो लगाएको नेत्रविक्रम चन्द नेतृत्वको माओवादीले दूतावासकै गल्तीका कारण घटना भएको बताएको छ। सो पार्टीका प्रवक्ता खड्गबहादुर विश्वकर्माले सेतोपाटीसँग कुरा गर्दै भने ‘हामीले भारतीय हस्तक्षेप र नाकाबन्दीको विरोधमा यसअघि नै भारतीय गाडी चल्न नदिने सार्वजनिक रुपमा भनेका थियौं तर दूतावासले यसको उल्लंघन गरेकाले गाडी जलाउनु परेको हो।
दूतावासको गाडी जलाउनु उचित हो त भन्ने प्रश्नमा विश्वकर्माले भने हामीले यस्तो उग्र कदम लिनु पर्ने अवस्था भारतले नै बनाएको हो। भारतीय विस्तारवादले हाम्रो राष्ट्र र राष्ट्रियतामाथि प्रहार गरेको छ। नचलाउनु भन्दाभन्दै गाडी चलाएको घटनाको दोष दूतावासलाई जान्छ।
शनिबार बिहान लाजिम्पाटमा भारतीय दूतावासको २२ सिडी १७ नम्बरको गाडीमा अचानक आगो लागेको थियो। प्रहरीले गाडीमा आफैं आगो लागेका बताएपनि विप्लव नेतृत्वको नेकपा माओवादीले आफूले आगो लगाएको बताएको छ। नेपालस्थित भारतीय दूतावासले भने प्राविधिक त्रुटीका कारण गाडीमा अागो लागेको जनाएको छ।
