भारतीय नम्बरको मिनी ट्रकमाथी शुक्रवार बिहान बुटवलमा आगो लगाइएको घटनाको जिम्मेवारी विप्लव नेतृत्वको नेकपा माओवादीले रुपन्देहीले लिएको छ।
बुटवलको राजमार्ग चौराहमा बिहान करिब ११ बजे भारतबाट केरा लिएर बुटवल आएको यू पी ५६ टी १६०१ नम्बरको उक्त गाडीमा पार्टिको केन्द्रिय निती अनुरुप आगो लगाईएको विप्लब नेतृत्वको नेकपा माओवादीका रुपन्देही सेक्रेटरी सरद वलीले जनाएका छन्।
भारतले नेपालमा नाकाबन्दी लगाएर ईन्धन र औषधि समेतका अत्यावश्यक वस्तुको आयातमा कडाई गरेको तर सड्ने र कुहिने तरकारी र फलफुलका गाडीहरु भने आयात हुन दिएको भन्दै नाकाबन्दीको विरोधमा पार्टिको केन्द्रिय तहबाटै भारतिय नं. का गाडी जलाउने र हिन्दी सिनेमा र हिन्दी च्यानल बन्द गर्ने निती तय गरेको वलीले सेतोपाटीलाई बताए।
“अघोषित नाकाबन्दी भन्दै देशलाई अत्यावश्यक ग्यांस, पेट्रोल, डिजेल तथा अन्य अत्यावश्यक सामग्रीहरु नपठाउने तर कुहिएका सढेगलेका सामग्रीहरुमात्रै देशभित्र पठाउने गरेको कारण नेपालमाथि भारतीय हस्तक्षेेप र नाकाबन्दीका विरुद्ध भारतीय नम्बर प्लेटका गाडी, हिन्दी सिनेमा तथा हिन्दी च्यानलहरु समेत बन्द गर्ने निर्णय लिएको हो,” वलीले भने।
बुटवलको सबैभन्दा व्यस्त चोक र प्रहरी बिटको नजिकै गाडी जलाईदा प्रहरीले भने गाडी आधा जलेपछिमात्र देखेको थियो।
बिग्रीएर सडकमा रोकिराखेको उक्त गाडीका चालक धर्मेन्द्र सिंह गाडीको सामान लिन गएको र गाडीसँगै रहेका राजेश पालले दुईजना व्यक्तिले गाडीमा आगजनी गरी भागेको दाबी गरेका छन्।
विप्लब नेतृत्वको नेकपा माओवादीले घटनाको जिम्मेवारी लिएपनि प्रहरीले घटनाको थप अनुसन्धान गरिरहेको जनाएको छ।
