उपप्रधान तथा पराराष्ट्र मन्त्री कमल थापाले नेपालको भारतसँग गरेको बाचा पुरा नगरेकाले नाकाबन्दी लगाएको बताएका छन्। शुक्रबार सिंहदरबारमा परराष्ट्रविदहरूसँगको छलफलमा थापाले भने,‘नेपालले भारतसँग गरेको केही बाचा पुरा गरेन, हामीलाई संविधान बनाउँदा पनि इग्नोर गरियो भन्ने भारतको बुझाइ छ त्यसैले यो अवस्था आयो।’
बैठकमा भएको कुराबारे प्रकाश पार्दै प्रकाशचन्द्र लोहनीले आज भएको गम्भीर बैठकबारे भारतसँग अब औपचारिक बार्ता गरेर हुँदैन अनौपचारिक वार्ता गरेर समस्या सुल्झाउनुपर्ने धारणा राखेका छन्।
‘कसले के बाचा गरेको थियो। त्यसको खोजी हुनुपर्यो,’ लोहनीले भने, ‘अब भारतसँग औपचारिक भन्दा पनि अनौपचारिक वार्ता हुनुपर्छ अनि समाधान निस्कन्छ।’
परराष्ट्रविद् एवं पूर्वमन्त्री रमेशनाथ पाण्डेले सरकारले आफ्नो आन्तरिक समस्या सल्ट्याउन ध्यान नदिंदा छिमेकीसँगको सम्बन्ध विग्रिएको बताएका छन्।
सर्वोच्च अदालत बार एशोसियशनले शुक्रबार काठमाडौंमा गरेको अन्तर्क्रियामा परराष्ट्रविद् पाण्डेले आन्तरिक समस्या हल गरेर सबै राजनीतिक दलहरुलाई राष्ट्रियताको पक्षमा एकतावद्ध गर्नुपर्नेमा यो मामिलामा सरकार चुकेको बताए।
उनले कुटनीतिक पहल गरेर नाकाबन्दी अन्त्य गर्ने सरकारका मन्त्रीहरुको भाषण आफूले बुझ्न नसकेको बताए। उहाँले अमेरिकाजस्तो शक्तिशाली मुलुक क्युवाजस्तो कमजोर मुलुकसँग ६५ वर्षपछि झुक्न वाध्य भएको प्रसंग सुनाउँदै मधेश आन्दोलन सम्बोधन गरेर सबै राजनीतिक दलहरु एक ठाउँमा उभिए भारत आफैं नाकाबन्दी अन्त्य गर्न वाध्य हुने बताए।
कार्यक्रममा वरिष्ठ अधिवक्ता विश्वकान्त मैनाली र वरिष्ठ पत्रकार युवराज घिमिरेले आफ्नो आन्तरिक समस्यामा पटक पटक विदेशीलाई गुहारेको परिणाम भारतले आफ्नो सुझाव विपरित संविधान जारी गरेको असन्तुष्टि स्वरुप नाकाबन्दी लगाउने साहस गरेको बताए।
उनीहरूले आन्दोलनकारी मधेशवादी दलहरुसँग तत्काल परिणाममुखी वार्ता गर्न सरकारसँग आग्रह समेत गए।