नेकपा (एमाले)का वरिष्ठ नेता एवम् पूर्व प्रधानमन्त्री माधवकुमार नेपालले मधेसवादी मोर्चाको माग केवल देशलाई असफल पार्ने र दुनियाँलाई हँसाएर नेपालीलाई कष्टमा डुबाउनेबाहेक अरु केही नभएको दाबी गरेका छन्।
नेता नेपालले इटहरीस्थित शुक्रबार सञ्चारकर्मीहरुसँगको भेटमा त्यस्तो धारणा राख्दै तराईवासीलाई उनीहरुले भनेभन्दा धेरै अधिकार संविधानले प्रत्याभूत गरिसकेको विषयलाई अझै मधेसवादी दलहरुले यथार्थ जनतासम्म पुर्याउन नचाहेको पनि स्पष्ट पारे।
बिहीबार साँझ इटहरीमा आइपुगेका वरिष्ठ नेता नेपालले सञ्चारकर्मीहरुसँग कुरा गर्दै मधेसमा लामो समयदेखि बस्दै आएका नेपाली जनतालाई समृद्ध बनाउने विषयमा सत्तामा बस्दा चाहिँ उनीहरुले किन योजना अघि सार्दैनन् त ? भनेर प्रश्न समेत गरे।
वरिष्ठ नेता नेपालले कसैप्रति सङ्केत नगरी कसैको उक्साहटमा गरिएको मधेस आन्दोलन र मधेसवासीको अधिकारका लागि भनिएको यो आन्दोलन सीमित व्यक्तिको स्वार्थसँग गाँसिएको विषयमा मधेसवासी आमनेपाली जनतालाई बुझाउन जरुरी रहेको पनि औँल्याए।
मधेसका वास्तविक नेपाली जनतालाई दास बनाउने कार्यमा मधेसवादी दलका नेताहरुले नै लामो समयदेखि प्रयत्न गरेको र उनीहरुलाई माथि उठ्नसमेत नदिने प्रपञ्चमा मधेसवादी नेताहरु नै रहँदै आएको तथा त्यस क्षेत्रमा कुनै पनि हिसाबले राज्यले विभेद नगरेको पनि नेता नेपालले तर्क गरे।
कुराकानीका क्रममा उनले नयाँ संविधान मधेसमैत्री भएको दाबी गरे। तर मधेसवादी दलले मधेसका जनतामा संविधान विरोधी भ्रम फैलाएको उनले बताए। त्यो भ्रमलाई चिर्न राजनीतिक दलले नसकेको भने उनले स्वीकार गरे।
तराई मधेसमा जारी आन्दोलनलाई वार्ताकै माध्यमबाट समाधान गरिनुपर्ने वरिष्ठ नेता नेपालको जोड छ । संविधानमा केही शब्द समेट्दा वा थप्दा मधेसवादी दलहरुलाई चित्त बुझ्छ भने समेट्न सकिन्छ तर अशान्ति र अराजकता भने उनीहरुले त्याग्नुपर्ने वरिष्ठ नेता नेपालले बताउनुभयो ।
सुनसरी र मोरङलाई टुक्र्याएर २ नं प्रदेशमा मिसाउने कुरामा एमालेको समर्थन नरहने उहाँले प्रष्ट पार्नुभयो र भन्नुभयो – “यहाँका जनता २ नं प्रदेशमा जान चाहँदैनन्, एमाले जनताको भावना विपरीत जाँदैन र कहिल्यै गएको पनि छैन ।”
सीमाङ्कनको विषय सङ्घीय आयोगमार्फत समाधान गर्न सकिने उहाँको भनाइ छ । त्यसमा असहमत हुने हो भने दुई तिहाइ बहुमत ल्याएर संविधान संशोधन गर्न उहाँले मधेसवादी दलहरुलाई चुनौती पनि दिनुभयो । उहाँ पार्टी सङ्गठनका लागि पूर्वी नेपालको भ्रमणमा निक्लनुभएको बुझिएको छ । रासस