पूर्वसभामुख सुवास नेम्वाङले नाकाबन्दी फिर्ता लिएर आए मधेसकेन्द्रित दलको माग सम्वोधन हुने बताएको छ।
नेकपा (एमाले) इलामद्वारा शुक्रबार बिहान आयोजित कार्यकर्ता भेटघाट कार्यक्रममा एमाले नेता नेम्वाङले मधेसकेन्द्रित दललाई सङ्केत गर्दै पहिले नाकाबन्दी फिर्ता लिएर देशलाई सहजतातर्फ उन्मुख हुन दिनुस्, तपार्इंहरूको माग सम्बोधन हुने बताए।
“पहिले संविधान स्वीकार गरेर प्रधानमन्त्रीको उम्मेदवारलाई भोट हाल्न चाहिँ आउने तर अहिले हामी संविधान मान्दैनौँ भनेर आन्दोलन र नाकाबन्दी गर्ने यो कुनै तर्क हुन्छ ?” तत्कालीन संविधानसभाका अध्यक्ष नेम्वाङले भने, “तपाईंहरूलाई चित्त नबुझेको छ भने संविधान संशोधन गरेर अघि बढौँ, समस्या समाधान हुन्छ ।”
नेपालको आन्तरिक मामलामा छिमेकीले पनि धेरै चासो राख्नु ठीक हुँदैन भन्दै उनले अहिलेको समस्यामा हस्तक्षेप नगर्न छिमेकी राष्ट्रलाई आग्रह गरे। लामो समयदेखि संविधान निर्माणमा खटेकाले अब आफू विकास निर्माण र जनताको सेवा गर्न चाहेको उनको भनाइ थियो। रासस
