संयुक्त लोकतान्त्रिक मधेसी मोर्चाले सुनसरीको इटहरीमा गर्न लागेको आम सभामा स्थानीय दलका विद्यार्थी संगठनहरुले अवरोध गरेका छन्।
उपेन्द्र यादव, राजेन्द्र महतो, कुमार लिंगदेनसहितका नेताहरुले सम्बोधन गर्ने भनिएको कार्यक्रमको लागि बनाइएको स्टेज नेकपा एमाले, एमाओवादी तथा राप्रपा नेपाल सम्बद्ध विद्यार्थी संगठनका नेताहरुले तोडफोड गरी जलाइदिएका छन्।
विद्यार्थीहरुले स्टेज जलाएपछि सुरक्षाको लागि अहिले ठूलो संख्यामा प्रहरी परिचालन गरिएको छ। नेपाल प्रहरी तथा शशस्त्र प्रहरीले स्टेज तथा कार्यक्रमको सुरक्षा दिने व्यवस्था मिलाए पनि आमसभाको विरोधमा विद्यार्थीलाई साथ दिन सर्वसाधारणहरु उत्रिने क्रम बढेको छ।
इटहरीमा कार्यक्रम हुने भनेर हिजो मोर्चाले जानकारी दिएको थियो। सोलगत्तै काँग्रेसको नेविसंघ सहित एमाले, एमाओवादीसम्बद्ध विद्यार्थी संगठनका स्थानीय नेताहरूले कार्यक्रम नगर्न चेतावनी दिँदै विज्ञप्ति निकालेका थिए। कार्यक्रमको उद्धेश्य सही नभएको, सुनसरी, मोरंग र झापालाई टुक्राउन खोजिएको भन्दै कार्यक्रमको विरोध गर्ने चेतावनी दिएपनि बिहानैदेखि कार्यक्रमको लागि स्टेज निर्माण थालिएको थियो।
कार्यक्रम गर्ने तयारी गरिएपछि विद्यार्थी संगठनका प्रतिनिधिहरुले कार्यक्रम विथोल्न स्टेज तोडफोड तथा आगजनी गरेका थिए। विज्ञप्तिमा साथै भएपनि कार्यक्रम विथोल्ने क्रममा काँग्रेसको नेविसंघको भने सहभागिता थिएन। संघलाई आमसभाको विरोध नगर्न दबाब आएको हुन सक्ने अनेरास्ववियु सुनसरीका अध्यक्ष एकराज दाहालले जानकारी दिए।
स्टेज तोडफोड र आगजनीलगत्तै सुरक्षाकर्मीले अहिले विद्यार्थीसहितको भीडलाई नियन्त्रणमा राख्ने प्रयास गरिरहेको छ। तर सुरक्षाकर्मीको घेराबन्दीमै पनि विद्यार्थीहरुले मानिसलाई जिउँदै जलाउनेलाई कार्यक्रम गर्न दिन नहुने, नाकाबन्दी फिर्ता गर्नुपर्ने, राष्ट्रिय स्वाभिमानको पक्षमा एकजुट हुनुपर्ने भन्दै नाराबाजी गरेका छन्। विद्यार्थीको कार्यक्रममा सहभागिता जनाउन इटहरी र आसपासका सहरहरुबाट मानिसहरु आउने क्रम जारी छ।
मोर्चाले पश्चिम नेपालका तराइमा सत्ताधारी दलका कार्यक्रम गर्न नदिने घोषणा नै गरेर कार्यक्रम विथोलिरहँदा मोर्चाको आन्दोलनको प्रभाव कम परेको इटहरीमा भने मोर्चाले आमसभा आयोजना गरेको हो। मोर्चामा सहभागि लिम्बुवान, जनजाती तथा मधेसी प्रतिनिधीहरुले अहिले ११ बजेदेखि सुरु गर्ने भनेर आमसभाको तयारीमा जुटेका थिए।