सत्तारूढ दल एमालेका बरिष्ठ नेता माधव नेपालले प्रादेशिक संरचनाको विषय तत्कालका स्थगित गर्नुपर्ने बताएका छन्। विराटनगर विमानस्थलमा बिहीबार सञ्चारकर्मीसँग कुरा गर्दै नेपालले प्रादेशिक संरचनाको विषयलाई बृहत छलफलपछि मात्र समाधान खोज्नुपर्ने भएकाले तत्कालका लागि स्थगन गर्नुपर्ने बताएका हुन्।
‘विभिन्न क्षेत्रबाट विभिन्न खालका धारणहरू आइरहेका छन्,’ उनले भने, ‘जनतालाई सोध्ने कुरा पनि आइरहेका छन्। अब जनमत अनुसार प्रादेशिक संरचनाको विषयमा वृहत छलफल हुनुपर्छ।’ तराई लगायतका मागहरू जायज भए नभएको र भएको भए जायज विषयलाई राज्यले सुन्नुपर्ने र संविधान संशोधन मार्फत टुंग्याउनुपर्ने नेपालले बताए।
अहिले तराईमा भारतको नाकाबन्दी र तराई आन्दोलनका कारण जनताले दुःख पाइरहेको भन्दै यसको समाधानन खोज्न जरूरी रहेको बताए। ‘सीमांकनको विषयमा सहमति हुने विषय भए सहमतिबाट नभए संघीय आयोगबाट सहमति खोज्नुपर्छ’, उनलेभ भने।
बंगलादेश र पाकिस्तानका राजदूतसँगको भेटमा उनीहरूले नेपालमा भारतले गरेको व्यवहार उचित नभएको राय दिएको बताए।