आगामी शुक्रबार बिहान दश बजे पहिलो उडानमार्फत पेट्रो म्याक्सले भारतको लखनऊबाट हवाई इन्धन ल्याउने भएको छ ।
नेपाल नागरिक उड्डयन प्राधिकरणले उडान तालिका मिलाउन समय लागेका कारण हवाई इन्धन आयातमा समय लागेको हो । यसअघि पेट्रो म्याक्सले आज साँझ हवाई इन्धन आयात गर्ने जनाएको थियो । सो कम्पनीले इथियोपियाको जहाज भाडामा लिएर लखनऊबाट हवाई इन्धन आयात गर्ने जनाएको छ ।
नेपाल आयल निगम त्रिभुवन विमानस्थलका प्रमुख प्रदीप यादवका अनुसार उडान तालिका र केही कागजात मिलाउन समय लागेका कारण आज ल्याउने भनिएको इन्धन ल्याउन नसकिएको हो । उनले पेट्रो म्याक्सले शुक्रबार बिहान दश बजे पहिलो खेप इन्धन ल्याउने बताए।
नेपाल आयल निगमले हवाई इन्धन आयात गर्न पेट्रो म्याक्सलाई अनुमति दिएको थियो । नेपाल वायु सेवा निगमले भन्दा केही सस्तो मूल्यमा इन्धन आयात गर्ने प्रतिबद्धता पेट्रो म्याक्सले जनाएको छ । सो कम्पनीले चार लाख लिटर हवाई इन्धन आयात गर्नेछ । उक्त परिमाणको इन्धन आन्तरिक वायुसेवा सञ्चालनका लागि पर्याप्त हो ।
इन्धन आपूर्ति असहज भइरहेको अवस्थामा निगमले नेपाल वायुसेवा निगमलाई हवाईमार्गबाट इन्धन ल्याउन अनुमति दिएको थियो । सोही अनुमतिका आधारमा नेवानिले हवाई इन्धन आयात गरिरहेको छ ।
काठमाडौँ–कोलकाता उडान गरेर नेवानिले प्रतिउडान २२ हजार लिटर हवाई इन्धन आयात गर्दै आएको छ । नेपाल आयल निगम त्रिभुवन विमानस्थल प्रमुख यादवका अनुसार पेट्रो म्याक्सले ल्याउने हवाई इन्धन आन्तरिक उडानका लागि पर्याप्त हुने भएकाले नेवानीले ल्याउने इन्धन भने भण्डारण गरिनेछ ।
नेवानिले आयात गरेको हवाई इन्धनको भरमा आन्तरिक हवाई सेवा प्रदायकले सेवा पु¥याउँदै आएका छन् । सरकारले गत असोज १४ गते जुनसुकै माध्यम, साधन, स्रोत र मुलुकबाट भएपनि इन्धन आयात गर्न निगमलाई निर्देशन दिएको थियो ।
त्यस्तै, व्यवस्थापिका–संसद्को सार्वजनिक लेखा समितिले सरकारलाई नै सहयोग पु¥याउने उद्देश्यले गत असोज २२ गते इन्धन आयातको सबै उपाय अपनाउन निर्देशन दिएको थियो ।
निगमले गत कात्तिक ३ गते विश्वव्यापी मनसायपत्र आह्वान गरी इन्धन आयातमा सहभागी हुन आग्रह गरेकोमा २२ वटा कम्पनी तथा संस्थाले इन्धन आयातको मनसाय राखेका थिए । तीमध्ये पेट्रो म्याक्सले सबैभन्दा सस्तोमा इन्धन आयात गर्ने प्रतिवद्धता जनाएको थियो । रासस