सरकारले भूकम्प पीडित परिवारलाई जाडो धान्ने कपडा किन्न रकम दिने निर्णय गरेको छ। मंगलबार बसेको मन्त्रिपरिषद् बैठकले कम्प प्रभावित परिवारलाई प्रतिपरिवार १० हजार रुपैयाँका दरले जाडो धान्ने कपडा किन्न रकम उपलब्ध गराउने पनि निर्णय गरेको सरकारका प्रवक्ता तथा सञ्चार मन्त्री शेरधन राईले बताए।
भारतले गरेको नाकाबन्दी र बन्द हड्तालका कारण भएको आर्थिक संकटलाई सम्बोधन गर्दै आगामी आर्थिक कार्यदिशा बारे श्वेतपत्र जारी गर्ने निर्णय पनि आजको मन्त्री परिषद बैठकले गरेको छ।
त्यस्तै, संविधान बारे आम नागरिकलाई सचेत बनाउन 'जनताको संविधान जनताकै माझमा' नामक १ महिने अभियान पनि सञ्चालन गर्ने निर्णय गरेको छ।
आगामी मंसिर २१ गतेबाट पुस २१ गतेसम्म सञ्चालन गर्ने निर्णय गरेको हो।
बैठकले नेपाल प्रहरीका केही अधिकारीहरुको सरुवा पनि गरेको छ।
यस्तै सरकारले जेष्ठ नागरिक भत्ता वितरण कार्य छिटो र सरल तरिका अघि बढाउने निर्णय पनि गरेको छ।