रौतहटको रंगपुरका स्थानीय बासिन्दाले दुई महिनाअघि आन्दोलनकारीले जलाएको प्रहरी चौकी बनाएर प्रहरीलाई बस्न दिएका छन्। दुई महिनाअघि मधेसी मोर्चा सम्बद्ध आन्दोलनकारीले सो प्रहरी चौकी आगजनी गरेपछि प्रहरी विस्थापित भएका थिए।
मंगलबार बिहान स्थानीय बासिन्दा प्रहरी चौकी मर्मत सम्भार गरी सरसफाइ पनि गरेका थिए। उनीहरुले नै प्रहरीलाई चौकीमा आएर बसिदिन आग्रह गरेको रौतहटका प्रहरी प्रमुख एसपी प्रधुम्न कार्कीले जानकारी दिए। उनका अनुसार स्थानीयले प्रहरी चौकीको नहुँदा शान्ति सुरक्षा र तस्करीको समस्या भएकाले स्थानीयले प्रहरी चौकीलाई गाउँमा बस्न आग्रह गरेका हुन्।
नयाँ संविधानमा असहमति राख्दै आन्दोलन गरिरहेको संयुक्त लोकतान्त्रिक मधेसी मोर्चाका कार्यकर्ताले जिल्लाका अन्य ठाउँमा पनि प्रहरी चौकीमा आक्रमण गरेर प्रहरी विस्थापित भएपनि अहिले सबै चौकीमा प्रहरी फर्किसकेको एसपी कार्कीले जानकारी दिए।
तीन महिनादेखि चलिरहेको मधेसी मोर्चाको आन्दोलन हिंसात्मक हुँदै जाँदा आन्दोलनकारी प्रहरीचौकी लगायत सरकारी कार्यालयमा आगजनी र तोडफोड गर्ने गरेका छन्।
