कृषि मन्त्री हरिबोल गजुरेलले सीमांकन समस्या समाधानबारे भारतसँग सकारात्मक वार्ता सुरू भएको बताएका छन्। एमाओवादी अध्यक्ष पुष्पकमल दाहाल र भारतीय राजदूत रञ्जित रेबीच सोमबार भएको भेटमा सीमांकनबारे कुरा भएको मन्त्री गजुरेलले बताए।
उनले सीमांकन समस्या भारतको चासोसँग पनि जोडिएको विषय भएकाले त्यसको समाधानका निम्ति पहल जरुरी भएको बताए। ‘भेटपछि मेरो अध्यक्षज्यूसँग कुरा भएको थियो, सीमाङ्कन समस्या समाधान गर्नेबारे सकारात्मक कुरा भएको उहाँले जानकारी दिनुभएको छ,’ विराटनगरमा मंगलबार सञ्चारकर्मीसँग कुरा गर्दै मन्त्री गजुरेलले भने,‘सीमांकन विषय भारतसँग जोडिएर आएको छ, यो त्यसति सजिलो पनि छैन, सीमाङ्कनबारे फरक–फरक सोच पनि छन्।’
छिमेकी बदल्न नसकिने बताउँदै मन्त्री गजुरेलले सम्बन्ध बिग्रिने र मिल्ने बताए। उनले उतारचढाबबाटै सम्बन्ध विस्तार हुने भन्दै छिमेकीसँग मिलेरै अघि बढ्नुपर्ने बताए। ‘उतारचढाबबाटै सम्बन्ध विस्तार हुने हो, बेला–बेला सम्बन्ध बिग्रिन्छ अनि फेरि मिल्छ,' उनले भने, ‘सँगै सुतेपछि लात्तीले छुन्छ, छिमेकीसँग मिल्ने हो छिमेकी बदल्न सकिँदैन।'
गजुरेलले भारतलाई मात्र दोष दिएर अहिले उम्किन सक्ने अवस्था नरहेको बताए। मन्त्री गजुरेलले भारतसँग कुरा भएको बताए पनि सीमाङ्कनको विषय भने त्यति सजिलो नभएको बताए। झापा, मोरङ, सुनसरी १ नम्बर प्रदेशमै हुनुपर्ने वा यी तीन जिल्लाको छुट्टै राज्य हुनुपर्ने दुबै विषय अहिले उठेको हुनाले त्यति सजिलो नभएको बताए।
‘पार्टीहरू वार्तामा बसेका छन्, भारतीय राजदूतसँग पनि कुरा भएको छ,' उनले भने, ‘निकास निस्किन सक्छ।' नेपालीहरू आफ्नो निर्णय आफैं गर्न सक्ने भए पनि सीमाङ्कनको विषय भारतसँग जोडिएर आएको हुनाले भारतसँग कुराकानी गर्नुपर्ने अवस्था आएको उनले बताए।
