सङ्घीय लोकतान्त्रिक गणतन्त्र नेपालको बुधबार हुने दोस्रो राष्ट्रपति चुनावमा तीन जनाले राष्ट्रपतिको उम्मेद्वारी दर्ता गराएका छन्। राष्ट्रपति पदमा नेकपा एमालेकी उपाध्यक्ष विद्या भण्डारी, नेपाली काँग्रेसका केन्द्रीय सदस्य कुलबहादुर गुरुङ र नेपाल मजदूर किसान पार्टीका केन्द्रीय सदस्य नारायण महर्जनको उमेद्वारी परेको हो। संसद् सचिवालयले मंगलबार विहान ११ बजेदेखि अपरान्ह १ बजेसम्म उमेद्वारी दर्ताको कार्यक्रम राखेकामा भण्डारी, महर्जन र गुरुङले पालैपालो उम्मेद्वारी दर्ता गराएका हुन्।
प्रधानमन्त्री केपी शर्मा ओली प्रस्तावक र समर्थक दलका नेतालाई साथ लिएर भण्डारीको उम्मेद्वारी दर्ता गराउन संविधानसभा भवन पुगेका थिए। एमाले उपाध्यक्ष भण्डारीलाई राष्ट्रपतिमा जिताउने प्रस्तावमा एकीकृत नेकपा माओवादीका अध्यक्ष पुष्पकमल दाहाल प्रस्तावक बसेका थिए। ११ दलका नेताले प्रस्तावप्रति समर्थन गरेका छन्। राप्रपा नेपालका अध्यक्ष कमल थापा, मधेशी जनअधिकार फोरम लोकतान्त्रिकका योगेन्द्र चौधरी, राप्रपाका दिपक बोहोरा, नेकपा मालेका सीपी मैनाली, समाजवादी जनता पार्टीका प्रेमबहादुर सिंह, नेकपा संयुक्तका जयदेव जोशी, राष्ट्रिय जनमोर्चाका चित्रबहादुर केसी, नेपाल परिवार दलका एकनाथ ढकाल, नेपाः राष्ट्रिय पार्टीका लक्ष्मण राजवंशी, राष्ट्रिय जनमुक्ति पार्टीका शिवलाल थापा र दलित जनजाति पार्टीका बिसेन्द्र पासवानले भण्डारीको उम्मेद्वारीमा समर्थन गरेका हुन्।
प्रस्तावक र समर्थक बसेका दल तथा आफ्नै पार्टीसँग भएका सांसदका आधारमा भण्डारी राष्ट्रपतिमा निर्वाचित हुने निश्चित भएको छ।
एमाले, एमाओवादी र समर्थक ११ दलसँग ३ सय ४ जना सभासद् छन्। नेपाली काँग्रेसले अन्य कुनै दलका नेतालाई प्रस्तावक र समर्थक नराखी केन्द्रीय सदस्य कुलबहादुर गुरुङलाई उमेद्वार बनाएको छ। गुरुङको प्रस्तावकमा पार्टी महामन्त्री प्रकाशमान सिंह र समर्थकमा अर्का महामन्त्री कृष्णप्रसाद सिटौला हुन्।
गुरुङको उमेद्वारी दर्ता गराउन काँग्रेसका सभापति सुशिल कोइराला, वरिष्ठ नेता शेरबहादुर देउवा र उपसभापति रामचन्द्र पौडेल संविधानसभा भवन पुगेका थिए। उमेद्वारी दर्तापछि हँसिलो मुद्रामा देखिएका गुरुङले पार्टीले आफूलाई राष्ट्रपतिको उमेद्वार बनाउनु खुसीको विषय भएको भन्दै जित्ने सुनिश्चित नभएपनि उमेद्वारी फिर्ता नलिने बताए।
नेपाली काँग्रेससँग २ सय ७ जना सांसद् छन्। प्रधानमन्त्रीको निर्वाचनमा नेपाली काँग्रेसका सभापति सुशिल कोइरालालाई भोट दिएका मधेशवादी दलहरुले पनि राष्ट्रपतिको निर्वाचनमा सहभागी नहुने बताइसकेका छन्। काँग्रेसका केन्द्रीय सदस्य गुरुङले उम्मेद्वारी दर्ता गराउनु पहिले नेपाल मजदूर किसान पार्टीका केन्द्रीय सदस्य नारायण महर्जनले उम्मेद्वारी दर्ता गराएका थिए।
काठमाडौं कीर्तिपुरका ५३ वर्षिय महर्जनले पार्टीका सभासद् प्रेम सुवाललाई प्रस्तावक र अर्का सभासद् डिल्लीप्रसाद काफ्लेलाई समर्थक राखेर उम्मेद्वारी दर्ता गराएका हुन्। प्रधानमन्त्रीको निर्वाचनमा एमाले अध्यक्ष केपी शर्मा ओलीलाई भोट दिएको नेमकिपाले राष्ट्रपतिमा अलग्गै उमेद्वार खडा गरेको हो। नेमकिपासँग ४ जना सांसद् छन्।
सहमतिका आधारमा राष्ट्राध्यक्ष चयन हुन नसकेपछि दलहरुले बहुमतीय प्रक्रियाका आधारमा राष्ट्रपतिको उम्मेदवारी दर्ता गराएका हुन्।