सरकार गठनका विषयमा निर्णय गर्न बसेको सत्तारुढ नेपाली काँग्रेसको केन्द्रीय समितिको बैठक केहीबेर अघि सकिएको छ।पार्टी सभापति सुशील कोइरालाले सरकार गठनका विषयमा नेकपा एमालेसँग कुनै सहमति नभएको बताउनासाथ वरिष्ठ नेता शेरबहादुर देउवा र उपसभापति रामचन्द्र पौडेलले आफूलाई प्रधानमन्त्रीको उम्मेद्वार बनाउन प्रस्ताव गरेपछि प्रधानमन्त्री निवास बालुवाटारमा बोलाइएको कांग्रेसको केन्द्रीय समितिको बैठक अहिले ८ बजे भोलि बिहान ११ बजे बस्ने गरी सकिएको छ।
अपरान्ह २ बजे सुरु भएको बैठक अहिले पनि जारी छ। केन्द्रीय समितिको बैठक बिहान ९ बजे बोलाइएकामा सभापति कोइराला, वरिष्ठ नेता देउवा र उपसभापति पौडेल गोप्य वार्तामा बसेपछि केन्द्रीय समितिको बैठक अपरान्ह २ बजे मात्र सुरु भएको थियो।
बैठकमा केन्द्रीय सदस्यहरुले सरकार गठनका विषयमा अलग अलग धारणा राखेका छन्। अधिकांशले पार्टी सभापति कोइरालाकै पक्षमा सरकार गठन गर्नुपर्ने बताएका छन् भने कतिपयले अबको सरकारको नेतृत्व वरिष्ठ नेता देउवाले गर्नुपर्ने धारणा राखेका छन्।
केही केन्द्रीय सदस्यले भने उपसभापति पौडेलको पक्षमा वकालत गरेका छन्। महामन्त्रीद्वय प्रकाशमान सिंह र कृष्णप्रसाद सिटौला लगायतले भने नेकपा एमालेको नेतृत्वमा प्रमुख दलहरु सम्मिलित सरकार गठन गर्नुपर्नेमा जोड दिएका छन्।
यस्तै प्रदिप गिरीले कुनै पनि हालतमा कांग्रेसले आफ्नो नेतृत्व छोड्न नहुने तर्क राखेका छन्।
हेर्नुहोस् भिडियोमा
कसले के भने-
सुशिल कोइराला
कांग्रेस केन्द्रीय कार्य समितिको बैठकमा बोल्दै प्रधानमन्त्री सुशील कोइरालाले आफूले केपी ओलीलाई प्रधानमन्त्री बनाउन भद्र सहमति नगरेको बताएका छन्।
‘भद्र सहमति हल्ला मात्रै हो,’ कोइरालाले भने। बिहान भरी चलेको कांग्रेस पदाधिकारीहरूको बैठकबारे जानकारी गराउँदै कोइरालाले भने,‘हामीबीच दुईवटा धारणा आएका छन्, एउटा आफ्नै नेतृत्वमा सरकार बनाउने र अर्को एमालेलाई सघाउने।’
शेरबहादुर देउवा
नेपाली कांग्रेसका बरिष्ठ नेता शेरबहादुर देउवाले कांग्रेसको जारी केन्द्रीय समितिको बैठकमा बोल्दै शुसील कोइरालाले पहिले सरकार निर्माणबारे आफ्नो धारणा स्पष्ट गर्नुपर्ने माग गरेका छन्।
उनले प्रश्न गरे-सभापति कोइराला आफैं प्रधानमन्त्री बन्न चाहनुहुन्छ कि ओलीलाई समर्थन गर्न चाहनुहुन्छ पहिले त्यो कुराको टुंगो हुनुपर्यो।
उनले नेपाली कांग्रेसले नै सरकारको नेतृत्व गर्नुपर्ने धारणा पनि राखे। ‘कांग्रेसले सहमतीय सरकारको नेतृत्व गर्नुपर्छ भन्ने मेरो धारणा छ।’ कांग्रेसले सरकारको नेतृत्व गर्ने भए आफू प्रधानमन्त्रीको उम्मेद्वार बन्न इच्छुक रहेको पनि बताए।
देउवाले कांग्रेसको प्रधानमन्त्री उम्मेदवार छान्न संसदीय दलको नेता चुन्नुपर्ने धारणा राखे।‘म आफू संसदीय दलको नेतामा उम्मेद्वारी दिन्छु, सभापतिले रामचन्द्रजीलाई सहयोग गरे हुन्छ।’
रामचन्द्र पौडेल
नेपाली कांग्रेसका उप-सभापति रामचन्द्र पौडेलले एमाओवादीलाई साथमा लिएर कांग्रेस आफैले सरकार निर्माण गर्नुपर्ने बताएका छन्। प्रधानमन्त्री निवास बालुवाटारमा जारी केन्द्रीय समितिको बैठकमा भर्खरै बोलिसकेका पौडेललले अबको सरकारको नेतृत्व कांग्रेसले नै लिनुपर्ने र एमाओवादीलाई साथमै लिएर अगाडि बढ्नुपर्ने बताएका छन्।
भूकम्पले क्षत विक्षत भएका जनतालाई राहत दिन पनि केन्द्रीय समितिले आफैलाई नेतृत्व गर्न दिनुपर्ने बताएका छन्।
म त सधैको भुक्त भोगी हुँ, सभापतिले पनि आश्वासन दिनुभएको छ, एक पटक मलाई मौका दिनुहोस् त्यसपछि केही भन्दिन,’ पौडेलले भने।
प्रकाशशरण महत
कांग्रेसकै नेतृत्वमा सहमतिका आधारमा संविधान बनेको छ। यसको सफल कार्यन्वयनका लागि अबको सरकारको भूमिका महत्वपूर्ण रहन्छ। त्यसका लागि पनि कांग्रेसको नेतृत्वमा नै सहमतिको सरकार बनाउनु पर्छ।
अब प्रधानमन्त्रीले नयाँ सरकार गठनका लागि विधि र प्रक्रिया अनुसार नै संसदीय दलको नेताको चयनको मार्ग खुला गरिदिनु पर्छ। ताकि हामीले लोकतान्त्रिक पद्दितीद्धारा नै दलको नेता चयन गरी सबैलाई मिलाएर सरकार बनाउनु पर्छ।
महालक्ष्मी (डिना) उपाध्याय
सहमतिको आधारमा निर्माण भएको संविधानको सफल कार्यन्वयनका लागि अहिले पनि दलहरुबीच सहमति र सहकार्य आवश्यक छ। अझ तराई मधेसमा देखिएको आन्दोलन र असन्तुष्टिलाई सम्बोधन गर्न संविधानमा संशोधन गर्न र संविधानकै आधारमा नयाँ कानूनहरु बनाउन पनि सहमति सरकारको आवश्यक छ। त्यसको नेतृत्व लोकतान्त्रिक सिद्धान्त बोकेको कांग्रेसले मात्रै सम्भव छ।
प्रधानमन्त्री सुशील कोइराला जस्को नेतृत्वमा सफलतापूर्वक संविधान निर्माण गर्न सफल भयो, उहालाई फादर अफ कन्स्टीटूसन भन्दा पनि फरक पर्दैन। अब उहाँले सफलता पूर्वक बनाएको संविधान सफल कार्यन्वयका लागि, अहिले देखिएको राष्टिय र अन्र्तराष्टिय चुनौतिको सामना गर्न पनि उहाँले संसदीय दलको नेता चयनको मार्ग प्रसस्त गर्नु पर्छ।
प्रकाशमान सिंह
नेपाली कांग्रेसका महामन्त्री प्रकाशमान सिंहले अबको सरकार एमाले नेतृत्वमा हुनुपर्ने धारणा राखेका छन्। प्रधानमन्त्री निवास बालुवाटारमा जारी केन्द्रीय समितिको बैठकमा भर्खरै बोलिसकेका सिंहले केपी ओली नेतृत्वको सरकारलाई कांग्रेसले समर्थन गर्नुपर्ने धारणा राखेका छन्।
कृष्णप्रसाद सिटौला र पूर्णबहादुर खड्का
नेपाली कांग्रेसका महामन्त्री कृष्णप्रसाद सिटौला र सह महामन्त्री पूर्णबहादुर खड्काले आफ्नो मत केन्द्रीय समितिको बैठकमा भर्खरै राखिसकेका छन्। दुबैले नेकपा एमालेको नेतृत्वमा मुख्य दलहरूको सहमतीय सरकार बनाउनुपर्ने र कांग्रेस पनि सरकारमा सहभागी हुनुपर्ने विचार राखेका छन्।
ओलीलाई प्रधानमन्त्रीमा सघाउने र कांग्रेसले राष्ट्रपतिको पद आफैसँग राख्नुपर्ने धारणा राखेका छन्।
विमलेन्द्र निधि
बैठकबाट बाहिरिँदै नेता विमलेन्द्र निधिले काँग्रेसकै नेतृत्वमा सरकार बन्नुपर्ने धारणा राख्दै त्यसका लागि पार्टीको तर्फबाट कोसिस गर्नुपर्ने बताएका छन्।
सुजाता कोइराला
नेपाली काँग्रेस केन्द्रीय सदस्य सुजाता कोइरालाले प्रधानमन्त्रीका लागि यसअघि एमालेलाई काँग्रेसले दिएको वचनबद्धता पूरा गर्नुपर्ने बैठकमा आफ्नो धारणा राखेको बताइन्। कोइरालाले अहिलेको अवस्थामा काँग्रेसले सत्ताभन्दा पनि सहमति, सहकार्यमा जोड दिनुपर्ने बताइन्।
बहुमतीय प्रक्रिया भोलिबाट प्रारम्भ हुने भएकाले आज रातिसम्म भए पनि बैठक सम्पन्न हुने र पार्टीले त्यसबारे निर्णय लिने बताइएको छ।
